دەپۋتاتتىق ساۋال. اۋىل شارۋاشىلىعىن دامىتۋ

مەملەكەت باسشىسى قاسىم-جومارت كەمەل ۇلى توقاەۆ حالىققا ارناعان جولداۋلارى مەن سايلاۋالدى باعدارلاماسىندا اگروونەركاسىپ كەشەنىن دامىتۋعا قاتىستى: «اۋىل شارۋاشىلىعىن دامىتۋ – نەگىزگى پروبلەمانىڭ ءبىرى.

وسى سالاداعى احۋال مەملەكەتىمىزدىڭ ازىق-ت ۇلىك قاۋىپسىزدىگىنە تىكەلەي اسەر ەتەدى. ءبىز الداعى ءۇش جىل ىشىندە اگروونەركاسىپتەگى وڭدەلگەن ءونىم ۇلەسىن 70 پايىزعا جەتكىزۋىمىز كەرەك.», — دەپ, ۇكىمەتكە ناقتى مىندەتتەر جۇكتەگەن ەدى. ەلدىڭ ءوسىپ-وركەندەۋى اۋىل شارۋاشىلىعىمەن تىكەلەي بايلانىستى. الايدا, سۋارمالى ەگىستىككە بايلانىستى بىرقاتار ماسەلەلەر تۋىنداۋىنان شارۋالاردىڭ وزدەرىنە تيەسىلى كومەكتەرگە قول جەتكىزە الماي جاتقان جايى بار. تۇركىستان وبلىسىنىڭ اۋىل شارۋاشىلىعىنىڭ نەگىزىن ماقتا جانە باۋ-باقشا داقىلدارىن ءوسىرۋ قۇرايدى, بۇل سالادا 83 مىڭ شارۋا قوجالىعى جۇمىس ىستەيدى. بۇل ءوڭىردىڭ ەگىستىك كولەمى 860 مىڭ گەكتار, سۋارمالى القاپ 552 مىڭ گەكتار جانە ەلىمىزدىڭ سۋارمالى جەرىنىڭ 4/1 قۇرايدى. تۇركىستان وبلىسى – ماقتا داقىلدارىن وسىرۋمەن اينالىساتىن بىردەن-ءبىر ايماق.

دەسە دە, بىلتىرعى جىل ماقتا شارۋاشىلىعىنا وڭايعا سوقپادى. ەگىن ناۋقانىنا شىعىندالعانى ازداي, ءونىمنىڭ باعاسىن بەلگىلەي الماعانى – «جىعىلعان ۇستىنە جۇدىرىق» بولدى. شارۋالار بەرىلەتىن سۋبسيدياسىنا زاڭداعى قايشىلىقتار سالدارىنان قول جەتكىزە الماي قالدى. سەبەبى, قازاقستان رەسپۋبليكاسىنىڭ اۋىل شارۋاشىلىعى ءمينيسترىنىڭ «اۋىل شارۋاشىلىعى تاۋارلارىن وندىرۋشىلەرگە سۋ بەرۋ بويىنشا كورسەتىلگەن قىزمەتتەردىڭ قۇنىن سۋبسيديالاۋ قاعيدالارىنىڭ» (2015ج. 30 ماۋسىمداعى № 6-3/597) 1-تاراۋىنىڭ 4-تارماعىنا سايكەس ەگىس القابىنا سۋ ەسەپتەگىش قۇرالدارى مەن قۇرىلعىلارى ورناتىلماعان جاعدايدا سۋبسيديا بەرىلمەيدى.

بۇل تالاپ اعىمداعى جىلدىڭ 1 قاڭتارىنان قولدانىسقا ەنگىزىلدى. سوندىقتان, شارۋالاردىڭ سۋارمالى جەرلەرىنە بەرىلەتىن سۋعا مەملەكەتتەن سۋبسيديا الۋ ءۇشىن سۋ ەسەپتەگىش قۇرالى بولۋى كاجەت.

ال ديقانشىلىق ماۋسىمدىق بولعاندىقتان, شارۋالار سۋ ەسەپتەگىشتەرىنىڭ ورناتىلۋىن كۇتە المايدى. ونىڭ ۇستىنە كوپتەگەن شارۋالاردىڭ قوندىرعى ورناتۋعا ءوز كۇشى جەتپەيدى جانە ولاردىڭ قاراجاتى دا شەكتەۋلى. اينالدىرعان 2 گەكتارعا ەگىن سالاتىندار پايداعا قارىق بولىپ جاتىر دەۋگە كەلمەس. وبلىستا ءبىر عانا ماقتانىڭ تۇسىمىنە ءبىر ميلليونداي تۇرعىننىڭ كۇنى قاراپ وتىرعانى جاسىرىن ەمەس. اۋىل شارۋاشىلىعى مينيسترلىگىنىڭ بۇل ۇستانىمى قازاقستانداعى اگروونەركاسىپ ونىمدەرىن وسىرەتىن بارلىق شارۋا قوجالىقتارىن الاڭداتىپ, ولاردىڭ جاعدايىنا قاۋىپ ءتوندىرىپ وتىر. وسى ورايدا, قۇرمەتتى ايداربەك سەيپىل ۇلى, قازاقستان رەسپۋبليكاسى اۋىل شارۋاشىلىعى ءمينيسترىنىڭ 2015 جىلعى 30 ماۋسىمداعى № 6-3/597 بۇيرىعىمەن بەكىتىلگەن اۋىل شارۋاشىلىعى تاۋارلارىن وندiرۋشiلەرگە سۋ بەرۋ بويىنشا كورسەتىلەتىن قىزمەتتەردىڭ قۇنىن سۋبسيديالاۋ قاعيدالارى 1-تاراۋىنىڭ 4-تارماعىن الىپ تاستاۋعا ىقپال ەتۋىڭىزدى جانە بۇل ماسەلە ازىق-ت ۇلىك قاۋىپسىزدىگىنە تىكەلەي اسەر ەتەتىندىكتەن, «AMANAT» پارتياسىنىڭ قاتاڭ باقىلاۋىندا بولاتىنىن ەسكەرۋىڭىزدى سۇرايمىن.