DEPÝTATTYQ SAÝAL. AÝYL ShARÝAShYLYǴYN DAMYTÝ

Memleket basshysy Qasym-Jomart Kemeluly Toqaev halyqqa arnaǵan Joldaýlary men Saılaýaldy baǵdarlamasynda agroónerkásip keshenin damytýǵa qatysty: «Aýyl sharýashylyǵyn damytý – negizgi problemanyń biri.

Osy saladaǵy ahýal memleketimizdiń azyq-túlik qaýipsizdigine tikeleı áser etedi. Biz aldaǵy úsh jyl ishinde agroónerkásiptegi óńdelgen ónim úlesin 70 paıyzǵa jetkizýimiz kerek.», — dep, Úkimetke naqty mindetter júktegen edi. Eldiń ósip-órkendeýi aýyl sharýashylyǵymen tikeleı baılanysty. Alaıda, sýarmaly egistikke baılanysty birqatar máseleler týyndaýynan sharýalardyń ózderine tıesili kómekterge qol jetkize almaı jatqan jaıy bar. Túrkistan oblysynyń aýyl sharýashylyǵynyń negizin maqta jáne baý-baqsha daqyldaryn ósirý quraıdy, bul salada 83 myń sharýa qojalyǵy jumys isteıdi. Bul óńirdiń egistik kólemi 860 myń gektar, sýarmaly alqap 552 myń gektar jáne elimizdiń sýarmaly jeriniń 4/1 quraıdy. Túrkistan oblysy – maqta daqyldaryn ósirýmen aınalysatyn birden-bir aımaq.

Dese de, byltyrǵy jyl maqta sharýashylyǵyna ońaıǵa soqpady. Egin naýqanyna shyǵyndalǵany azdaı, ónimniń baǵasyn belgileı almaǵany – «jyǵylǵan ústine judyryq» boldy. Sharýalar beriletin sýbsıdııasyna zańdaǵy qaıshylyqtar saldarynan qol jetkize almaı qaldy. Sebebi, Qazaqstan Respýblıkasynyń Aýyl sharýashylyǵy mınıstriniń «Aýyl sharýashylyǵy taýarlaryn óndirýshilerge sý berý boıynsha kórsetilgen qyzmetterdiń qunyn sýbsıdııalaý qaǵıdalarynyń» (2015j. 30 maýsymdaǵy № 6-3/597) 1-taraýynyń 4-tarmaǵyna sáıkes egis alqabyna sý eseptegish quraldary men qurylǵylary ornatylmaǵan jaǵdaıda sýbsıdııa berilmeıdi.

Bul talap aǵymdaǵy jyldyń 1 qańtarynan qoldanysqa engizildi. Sondyqtan, sharýalardyń sýarmaly jerlerine beriletin sýǵa memleketten sýbsıdııa alý úshin sý eseptegish quraly bolýy kajet.

Al dıqanshylyq maýsymdyq bolǵandyqtan, sharýalar sý eseptegishteriniń ornatylýyn kúte almaıdy. Onyń ústine kóptegen sharýalardyń qondyrǵy ornatýǵa óz kúshi jetpeıdi jáne olardyń qarajaty da shekteýli. Aınaldyrǵan 2 gektarǵa egin salatyndar paıdaǵa qaryq bolyp jatyr deýge kelmes. Oblysta bir ǵana maqtanyń túsimine bir mıllıondaı turǵynnyń kúni qarap otyrǵany jasyryn emes. Aýyl sharýashylyǵy mınıstrliginiń bul ustanymy Qazaqstandaǵy agroónerkásip ónimderin ósiretin barlyq sharýa qojalyqtaryn alańdatyp, olardyń jaǵdaıyna qaýip tóndirip otyr. Osy oraıda, qurmetti Aıdarbek Seıpiluly, Qazaqstan Respýblıkasy Aýyl sharýashylyǵy mınıstriniń 2015 jylǵy 30 maýsymdaǵy № 6-3/597 buıryǵymen bekitilgen aýyl sharýashylyǵy taýarlaryn óndirýshilerge sý berý boıynsha kórsetiletin qyzmetterdiń qunyn sýbsıdııalaý qaǵıdalary 1-taraýynyń 4-tarmaǵyn alyp tastaýǵa yqpal etýińizdi jáne bul másele azyq-túlik qaýipsizdigine tikeleı áser etetindikten, «AMANAT» partııasynyń qatań baqylaýynda bolatynyn eskerýińizdi suraımyn.