«دىنگە تىيىم سالىنادى»: قازاقستاندا سپورتشىلاردىڭ ەتيكاسى بەكىتىلدى

قازاقستان رەسپۋبليكاسىنىڭ تۋريزم جانە سپورت ءمينيسترىنىڭ 2025 جىلعى 27 ماۋسىمداعى بۇيرىعىمەن ەلىمىزدىڭ سپورتتىق ەتيكاسىنا وزگەرىستەر ەنگىزىلدى, دەپ حابارلايدى Skifnews.kz اقپارات پورتالى.

جاڭا رەداكتسيادا قابىلدانعان سپورتتىق ەتيكا سپورتشىلاردىڭ, جاتتىقتىرۋشىلاردىڭ, وقىتۋشى-جاتتىقتىرۋشىلار مەن سپورت تورەشىلەرىنىڭ مىنەز-ق ۇلىق نورمالارىن بەلگىلەيدى.

ەندى سپورتشىلار, جاتتىقتىرۋشىلار, وقىتۋشى-جاتتىقتىرۋشىلار مەن تورەشىلەر مىنا تالاپتاردى ورىنداۋى ءتيىس:

• قوعامدىق ورىنداردا ماس كۇيىندە (الكوگول, ەسىرتكى نەمەسە ۋىتتى زاتتاردىڭ اسەرىمەن) جۇرۋگە جول بەرمەۋ;

• ادامگەرشىلىككە جانە قوعامنىڭ مورالدىق قۇندىلىقتارىنا ساي بولۋ;

• ادال ويىن ءپرينتسيپىن ساقتاۋ;

• ۇلتتىق قۇرامالار, قارسىلاستار, جانكۇيەرلەر مەن جارىس ۇيىمداستىرۋشىلارىنا قۇرمەتپەن قاراۋ;

• وزگە سپورتشىلار مەن ەرىكتىلەردىڭ ار-نامىسىن قۇرمەتتەۋ جانە ولاردىڭ قۇقىقتارىن تاپتاماۋ, سونداي-اق, سپورتتىق شارالار مەن ماراپاتتاۋ راسىمدەرىندە ساياسي ۇراندارعا جول بەرمەۋ;

• داۋ-جانجالدان اۋلاق بولۋ, سپورتتىق بەدەلگە نۇقسان كەلتىرمەۋ;

• قازاقستان رەسپۋبليكاسىنىڭ مەملەكەتتىك رامىزدەرىنە جانە وزگە ەلدەردىڭ مەملەكەتتىك رامىزدەرىنە قۇرمەتپەن قاراۋ;

• قازاقستاننىڭ مەملەكەتتىك ءانۇرانىنىڭ ءماتىنى مەن مۋزىكالىق رەداكتسياسىن ءبىلۋ, ونى ورىنداۋ كەزىندە ەتيكالىق نورمالاردى ساقتاۋ;

• تورەشى شەشىمىنە قۇرمەتپەن قاراۋ, جاريا تۇردە داۋ تۋدىرماۋ;

• سپورتتىق ماراپاتتاردى (كۋبوك, مەدال, ديپلوم) قادىرلەۋ;

• جارىستارداعى ماراپاتتاۋ راسىمىنە قاتىسۋ;

• رەسمي ءفوتوتۇسىرىلىم, ماراپاتتاۋ, باق-پەن جۇمىس بارىسىندا ۇلتتىق قۇرامانىڭ نەمەسە سپورت كلۋبىنىڭ كيىم ۇلگىسىن كيۋ;

• باق وكىلدەرىنىڭ جۇمىسىنا قۇرمەتپەن قاراۋ;

• وزگە سپورتشىلارعا ۇلگى بولا ءبىلۋ;

• سپورت جارىستارىنىڭ ەرەجەلەرىن ساقتاۋ.

سونىمەن قاتار, تىيىم سالىناتىن ارەكەتتەردىڭ قاتارىنا:

• وقۋ-جاتتىعۋ پروتسەسىنە قاتىستى اقپاراتتى جاريالاۋ;

• بەيادەپ سوزدەر مەن ىم-يشارانى قولدانۋ;

• جارىس نەمەسە وقۋ-جاتتىعۋ جيىنىنا كەدەرگى كەلتىرۋ نەمەسە ەلىمىزدىڭ بەدەلىنە نۇقسان كەلتىرەتىن ارەكەتتەر جاساۋ;

• جارىس الدىندا, بارىسىندا نەمەسە كەيىن قانداي دا ءبىر ادامعا سوزبەن, جازباشا تۇردە, ىم-يشارا ارقىلى قوقان-لوقى كورسەتۋ;

• ءدىني نانىمدارىن اشىق ناسيحاتتاۋ, وزگەلەردى ءدىني بىرلەستىكتەردىڭ جۇمىسىنا نەمەسە ميسسيونەرلىك ارەكەتكە ماجبۇرلەۋ.

جەكە جاتتىقتىرۋشىلار سپورتشىلارعا قازاقستاننىڭ مەملەكەتتىك ءانۇرانىن ۇيرەتۋگە مىندەتتى.

دەنە شىنىقتىرۋ جانە سپورت ۇيىمدارى سپورتتىق ەتيكانىڭ ءماتىنىن كورنەكى جەردە ورنالاستىرۋى ءتيىس. سونىمەن قاتار, سپورتتىق قىزمەتكە قاتىستى كەلىسىمشارت جاسالعان كۇننىڭ وزىندە سپورتشىلار مەن ماماندار ەتيكامەن جازباشا تۇردە تانىستىرىلۋى قاجەت.

اتالعان بۇيرىق 2025 جىلعى 19 شىلدەدەن باستاپ كۇشىنە ەنەدى.