ديزەل وتىنى تاپشىلىعى ءۇشىن قىزمەتىنەن بوساتىلعان بۇرىنعى ەنەرگەتيكا ۆيتسە-ءمينيسترى «قازمۇنايگازدا» جاڭا قىزمەتكە تاعايىندالدى

فوتو: اشىق دەرەككوز

2023 جىلى ساۋىردە ەلدەگى ديزەل وتىنى تاپشىلىعىنا بايلانىستى ەنەرگەتيكا ۆيتسە-ءمينيسترى قىزمەتىنەن بوساتىلعان اسەت ماعاۋوۆ جاڭا قىزمەتكە تاعايىندالدى, دەپ حابارلايدى Qandastar.kz kursiv.media سىلتەمە جاساي وتىرىپ.

ياعني, «قازمۇنايگاز» ۇك اق باسشىلىق قۇرامى وزگەردى. باسقارما توراعاسىنىڭ ورىنباسارى قىزمەتىنە ءدال وسى بۇرىنعى ەنەرگەتيكا ۆيتسە-ءمينيسترى كەلدى.

اسەت ماعاۋوۆ پەن بىرگە قمگ باسقارما توراعاسىنىڭ تاعى ءبىر ورىنباسارى بولىپ بەكزات ابايىلدانوۆ تاعايىندالدى.

بۇل رەتتە اسەت ماعاۋوۆ مۇناي وڭدەۋ جانە مۇناي حيمياسى, مۇناي وڭدەۋ زاۋىتتارىنىڭ قىزمەتى ماسەلەلەرىنە جەتەكشىلىك ەتپەك.

ال بەكزات ابايىلدانوۆ مۇناي جانە گاز ءوندىرۋ, گەولوگيالىق بارلاۋ باعىتىن باسقارادى.

اتالعان ازاماتتار قازاقستاننىڭ مۇناي-گاز سالاسىندا بۇرىننان جۇمىس ىستەپ كەلە جاتقان ادامدار. ماسەلەن, ماعاۋوۆ ەڭبەك جولىن 1994 جىلى «تەڭىزمۇنايگاز» اق-دا ەكونوميست بولىپ باستاعان.

ءار جىلدارى ەنەرگەتيكا ۆيتسە-ءمينيسترى, مۇناي جانە گاز ۆيتسە-ءمينيسترى بولىپ جۇمىس ىستەدى. سونداي-اق «تەڭىزشەۆرويل» جشس باس ديرەكتورىنىڭ ورىنباسارى, «ماڭعىستاۋمۇنايگاز» اق باس ديرەكتورى قىزمەتىن اتقاردى. «قازمۇنايگاز» ۇك جاق باسقارۋشى ديرەكتورى, مۇناي-گاز ماشينالارىن جاساۋدى دامىتۋدىڭ حالىقارالىق ورتالىعىنىڭ باس ديرەكتورى قىزمەتتەرىن اتقاردى. 2019 جىلى ەنەرگەتيكا ۆيتسە-ءمينيسترى قىزمەتىنە كەلىپ, 2023 جىلى بوساتىلدى.

ال بەكزات ابايىلدانوۆ ەڭبەك جولىن «وزەنمۇنايگاز» اق فيليالىنىڭ №1 مۇناي-گاز ءوندىرۋ باسقارماسىندا وپەراتور كومەكشىسى بولىپ باستادى. ءار جىلدارى «قازمۇنايگاز» بارلاۋ ءوندىرۋ» اق باس ديرەكتورىنىڭ ءوندىرىس جونىندەگى ورىنباسارى بولدى. «وزەنمۇنايگاز» اق باس ديرەكتورى, «قازترانسگاز» اق باسقارما توراعاسىنىڭ گەولوگيالىق بارلاۋ جانە ءوندىرۋ جونىندەگى ورىنباسارى قىزمەتىن اتقاردى. «كاسپي مۇناي» اق باس ديرەكتورى بولدى.

ەسكە سالا كەتسەك, 2023 جىلى سول كەزدەگى ۆيتسە-مينيستر ماعاۋوۆ جانار-جاعارماي باعاسى بىرتىندەپ كوتەرىلەتىنىن مالىمدەگەن ەدى. سول تۇستا ول قازاقستاندا جانارماي باعاسىن ەاەو ەلدەرىمەن تەڭەستىرۋدى ۇسىنعان.