«Dollarlap laqtyrdy… »: «Dıkıı Armandy» tanymaı ketken juldyzdardyń qatarynda kim bar

Foto: ashyq derekkóz

Búgin «Dıkıı Arman» laqap atymen tanymal Arman Jumageldıevke qatysty kópke sozylǵan sot úkimi shyqty. 20 jylǵa bas bostandyǵynan aıyrýǵa jaza kesilgen qylmys áleminiń serkesi kezinde biraz sportshy men ánshi-jyrshylarǵa demeýshilik jasaǵan. Tipti, onyń jelide aqsha shashyp, kópti kókqaǵazdyń astynda qaldyrǵany el arasyna ańyzdaı taraǵan edi, dep jazady qandastar.kz nege.kz-ke silteme jasap. 

Bir kezderi Armanǵa sheksiz alǵys bildirgenderdiń alǵy qatarynda dástúrli ánshi Narkenje Serikbaeva boldy.

«Meniń ómirim» baǵdarlamasynan skrınshot

«Bári kórdi ǵoı YouTube-tan dollar laqtyryp jatqanyn, sol túskenine áýeli keldim de, osynnan úı̆ aldym. Qazir 8 bólmeli úıim bar, Allaǵa shúkir. Odan keı̆in Dýbaı̆ǵa bardyq. Ol kisiniń taǵy da bergen syılyǵyna úı̆imniń ishin toltyrdym. Kádimgi túzý joldaǵy, qazaq dep jany ashıtyn er azamattyń biri, kádimgi qazaqtyń batyry», ― degen edi Serikbaeva.

Bir qyzyǵy, kezinde osylaı degen dástúrli ánshige shyǵyp, Armanǵa qanshalyqty janashyrlyq tanytatynyn suraǵanymyzda: «Men organda jumys istemeımin. Kezinde bári aıtqanda men de ol jaıynda oıymdy bildirip qoıǵam. Eshteńe bere almaıdy ekem», – dep pikir bildirýden úzildi-kesildi bas tartty.

Aqparǵa berik ǵalamtordy aqtarystyrsaq Arman Jumageldıevtiń shoý-bızneste Dınara Qyryqbaevamen de etene aralasqanyn ańǵarýǵa bolady. Máselen, olardyń Túrkııada, Dýbaıda túsken sýretteri jarııa bolǵanda, kópshilik ekeýin kóńil qosty dep topshylaǵan.

Instagram.com/ Kyrykbayeva

Budan soń ánshi jelidegi paraqshasynda «Men úshin Arman tek jaqyn aǵam. Aǵam dep qana syılaımyn. Aralasamyn, qurmetteımin. Basqa áńgime aıtýdyń keregi joq. Ondaı jeke máselede artyq áńgime aıtpasańyzdar eken», – dedi. Jaqyn aǵasy jaly ne aıtady degen oımen Qyryqbaevaǵa da habarlasyp kórdik, alaıda telefony sóndirýli boldy. Al jelidegi paraqshasyna kezinde aǵam dep ózeýregen Armanǵa qatysty oıyn jarııa ete qoımady.

Jumageldıev jalǵandy jalpaǵynan basyp turǵanda aldynda ásem án shyrqaǵandar qatarynda dástúrli ánshi Qazybek Ádikeı de bar. 2021 jyly ıýtýbta taraǵan bir beınejazbadan Jumageldıevtiń ánshiden Qytaıdaǵy qıyn jaǵdaıdy ótkerip jatqan qandastarǵa arnap bir án oryndaýyn suraǵanyn kórýge bolady. О́tinishti jerde qaldyrmaǵan óner ıesi Ashat Káýkerulynyń sózine jazylǵan «Jetkizshi bir habaryn» ánin naqyshynda oryndaıdy.

Q.Ádikeıdiń ınstagram paraqshasynan

Sońyrsyn Ádikeı «31»-shi arnanyń «Juldyzdar jarqyraıdy» baǵdarlamasynda ózin atyshýly «Jabaıy Armanmen» ne baılanystyratynyn aıtqan. «Shaqyrǵan jerden qalma deıdi. Kim shaqyrsa da óner adamynyń bári barady ǵoı. Qýana-qýana barady-aý», – dep shynyn aqtardy. Osylaı degen Qazybek Ádikeı de Jumageldıev jaıly jeke paraqshasynda janashyrlyq tanyta qoımady. Al uıaly telefonyna shyqqanymyzda, tutqany kótermedi.

Túrkııada turyp jatqan Aınur Tursynbaevanyń dúrkirete jasaǵan toıynda Jumageldıevpen dastarhandas bolǵan ónerpazdar arasynda Balǵynbek Imashevtyń da bolǵany anyq. Buǵan ǵalamtorda taralǵan beınejazbalar dálel. Máselen, onyń aldynda «Bodan bolyp armany ólgen qazaǵymnyń, Armanyn tiriltti ǵoı – Arman batyr» dep arnaý aıtqan Imashev keıin ony «tanymaımyn» dep tanyp shyqty.

Vıdeodan skrınshot

TALK LIKE baǵdarlamasynda: «Men ony tanymaımyn, ondaı jigit bar ekenin bilmeıdi ekenmin. Túrkııaǵa Aınur Tursynbaevaǵa barǵanbyz. Aınur tusaýkeserge, odan qaldy shujyq shyǵarǵanda shaqyrdy. О́ıtkeni Aınurdyń kúıeýi sol Armannyń joldas jigiti eken. Sondaı bir is-sharalarda kezdesip qalǵanym bolmasa, «Armanǵa bardy» degen áńgime shyndyqqa janaspaıdy» dedi.

Iá, «Jabaıy Arman» ataǵy aspandap turǵanda ózi shyńdalǵan sport salasyndaǵy azamattardy aınalyp ótpedi. Mysaly, Baqtııar Artaev Qazaqstan boks federaııasynyń vıe-prezıdenti jáne memlekettik bapker qyzmetinde turǵan shaǵynda Belgradta ótken álem chempıonatynyń jartylaı fınalyna óte almaı qalǵan otandyq sportshylarǵa qoldaý esebinde eki myń dollardan úlestirdi. Álbette munyń sońy shýǵa aınaldy. Bir top onyń áreketine súısinse, endi bireýler krımınaldyq avtorıtettiń demeýshiligine qarsylyq tanytty. Budan soń Jumageldıev pen Artaev birlese vıdeo málimdeme jasaǵan.

Vıdeodan skrın

Armannyń áreketin azamatyqqa balaǵan Artaev beınejazbada: «Kim qaı jaqta júrmesin, bir eldiń múddesi úshin áreket etip jatyrmyz. Bul – Arman, bul– Baqtır dep bólýge bolmaıdy. Bárimiz bir eldiń balasymyz» dep aǵynan jarylǵan edi. Keıin Qańtar oqıǵasynan soń «Dıkıı Arman» qolǵa túskende Artaev joldasyn qoldaı post ta jazdy. Sportshy «baýyry úshin júregi aýyratynyn» aıtyp, ony bosatýdy suraǵan.

Keıin Artaevtyń osy «azamattyǵy» óziniń basyna tas bolyp tıip, qyzmetinen shettelýge alyp keldi. Muny rastaǵan ol «Ýaqyt kórsetedi» YouTube-arnasynda: «Kim kimmen aralaspaı jatyr? Taza aqymaqtyq. Ashyǵyn aıtaıyq, túngi saǵat 2-de qorqor shegip otyryp, sol kezdegi Sport komıtetiniń basshysy habarlasty. «Dıkıı Armanmen» aralasady ekensiń, jumysty bosatýyń kerek» dedi», – dep bar shyndyqty jaıyp salǵany bar.

Jumageldıevti qoldaımyn dep jumsaq orynynan aıyrylǵan Artaevqa bul joly biz de shyǵyp kórdik. Biraq buǵan deıin basynan ótkergenderi júregine tıdi me, Baqtııar da pikir bildirýden bas tartty.

Bul «Jabaıy Armannyń» jalǵandy jalpaǵynan basyp júrgende janynan tabylǵandardyń bir parasy ǵana. Biraq qara basyna kún týǵanda Artaevtaı arasha túskenderdi kóre almadyq. Osy oraıda Jambylda ótken alaman aıtysta belgili aıtysker aqyn Qaınar Alagózovtyń aıtqany eriksiz eske oralady.

«… Men ol úshin bireýmin bir jaqtaǵy,

Biraq meniń júregim shyn jaqtady.

Kezinde talaı ánshi ánin arnap,

Talaı aqyn aldynda jyr jattady.

Qasyna kók shybyndaı úıilgender,

Basyna kún týǵanda kim jaqtady?!

Qulan aıǵyr qudyqqa qulap edi,

Qurbaqa qulaǵynda qyljaqtady…».