جاڭالىقتار
دسم دەرەكتەر بازاسىنا زاڭسىز كىرگەن ەكى قازاقستاندىققا 1,1 ميلليون تەڭگە ايىپپۇل سالىندى
فوتو: Zakon.kz
قر ۇلتتىق قاۋىپسىزدىك كوميتەتى پروكۋراتۋرانىڭ ۇيلەستىرۋىمەن قازاقستان رەسپۋبليكاسى دەنساۋلىق ساقتاۋ مينيسترلىگىنىڭ اقپاراتتىق جۇيەلەرىنە زاڭسىز قول جەتكىزگەنى ءۇشىن جەتىسۋ وبلىسىنىڭ ەكى تۇرعىنىنا قاتىستى قىلمىستىق ءىس بويىنشا تەرگەۋدى اياقتادى, دەپ حابارلايدى qandastar.kz
بۇل تۋرالى بۇگىن, 2025 جىلدىڭ 10 اقپانىندا ۇقك Telegram ارناسىنان بەلگىلى بولدى.
«اعىمداعى جىلدىڭ 30 قاڭتارىندا تالدىقورعان قالاسى سوتىنىڭ شەشىمىمەن ولار قىلمىستىق كودەكستىڭ 205-بابىنىڭ 2-بولىگىندە جانە 208-بابىنىڭ 2-بولىگىندە كوزدەلگەن قىلمىستاردى جاساعانى ءۇشىن كىنالى دەپ تانىلىپ, 300 ايلىق ەسەپتىك كورسەتكىش مولشەرىندە ايىپپۇل سالۋعا سوتتالدى», – دەپ جازىلعان رەسمي اقپاراتتا.
تەرگەۋ بارىسىندا مەديتسينالىق قىزمەتكەرلەردىڭ تىركەلگىلەرىن زاڭسىز يەمدەنۋ ارقىلى ولاردىڭ قر دەنساۋلىق ساقتاۋ مينيسترلىگىنىڭ «تىركەلگەن حالىق ءتىزىلىمى» جانە «Damumed» اقپاراتتىق جۇيەلەرىنە زاڭسىز قول جەتكىزگەنى انىقتادى.
Zakon.kz جازعانداي, 2025 جىلدىڭ 6 اقپانىندا تالدىقورعان قالالىق سوتى تۇتقىنعا قوسىمشا ۇكىم شىعارعانى حابارلاندى. تەررورلىق اكت تۋرالى كورىنەۋ جالعان حابار بەرگەنى ءۇشىن ەر ادامعا جاڭا جازا كەسىلدى.
