جاڭالىقتار
دۋبايدا تۇساۋىن كەسكەن ايەلدىڭ ارەكەتى ەلدىڭ اشۋىنا ءتيدى
الەۋمەتتىك جەلىدە دۋبايدا ەرەسەك ايەلگە تۇساۋ كەسۋ ءراسىمى وتكىزىلگەنى تۇسىرىلگەن ەرەكشە ۆيدەو تارادى, دەپ حابارلايدى Qandastar.kz اقپاراتتىق پورتالى.
ادەتتە كىشكەنتاي بالالارعا جاسالاتىن سالتتىڭ بۇل جولى ەرەسەك ايەلگە جاسالعانى جەلى قولدانۋشىلارىنىڭ قىزۋ تالقىسىنا سەبەپ بولدى.
ۆيدەودان ايەل ادامنىڭ اق كويلەك كيىپ, جايىلعان اق شۇبەرەكتىڭ ۇستىنە تۇرعانىن كورۋگە بولادى. اياعىنا اق ارقان بايلانىپ, «تۇساۋى» كەسىلگەن سوڭ, ەكى ايەل سۇيەمەلدەپ ونى شۇبەرەكتىڭ بويىمەن العا-ارتقا جۇرگىزەدى. ايەل قوبالجىپ, كوزىنە جاس الادى.
جەلى قولدانۋشىلارى ۆيدەونى قىزۋ تالقىلاپ, ءتۇرلى پىكىرلەر قالدىرۋدا:
«ەندى بەسىككە سالۋدى كۇتەمىز. مالديۆ ارالدارىندا», «اركىم وزىنشە ەسىنەن اداسادى», «سەندەردىڭ ەستەرىڭ دۇرىس پا?», – دەلىنگەن پىكىرلەردە.
كەيبىر جەلى قولدانۋشىلارى ايەلدى قورعاپ, تۇساۋ كەسۋدىڭ تەرەڭ ماعىناعا يە ەكەنىن, ءارى تەك بالالارعا عانا ەمەس, ەرەسەكتەرگە دە ارنالۋى مۇمكىن ەكەنىن ايتتى. پىكىر قالدىرۋشىلاردىڭ ايتۋىنشا, قازىرگى زاماندا بۇل سالت-ءداستۇر زاماناۋي مازمۇنمەن بايىتىلىپ, ەرەسەكتەرگە دە بەيىمدەلىپ ورىندالۋى مۇمكىن.
«ادام ءوز اقشاسىن قالاي جۇمسايتىنىن جانە ومىرىندەگى ماڭىزدى ساتتەردى قالاي اتاپ وتەتىنىن ءوزى تاڭدايدى. ءتىپتى وسىنداي ەرەكشە تاسىلمەن بولسا دا», – دەيدى ءبىر پىكىر قالدىرۋشى.
