Dýbaıda tusaýyn kesken áıeldiń áreketi eldiń ashýyna tıdi

Áleýmettik jelide Dýbaıda eresek áıelge tusaý kesý rásimi ótkizilgeni túsirilgen erekshe vıdeo tarady, dep habarlaıdy Qandastar.kz aqparattyq portaly. 

Ádette kishkentaı balalarǵa jasalatyn salttyń bul joly eresek áıelge jasalǵany jeli qoldanýshylarynyń qyzý talqysyna sebep boldy.

Vıdeodan áıel adamnyń aq kóılek kıip, jaıylǵan aq shúberektiń ústine turǵanyn kórýge bolady. Aıaǵyna aq arqan baılanyp, «tusaýy» kesilgen soń, eki áıel súıemeldep ony shúberektiń boıymen alǵa-artqa júrgizedi. Áıel qobaljyp, kózine jas alady.

Jeli qoldanýshylary vıdeony qyzý talqylap, túrli pikirler qaldyrýda:

«Endi besikke salýdy kútemiz. Maldıv araldarynda», «Árkim ózinshe esinen adasady», «Senderdiń esteriń durys pa?», – delingen pikirlerde.

Keıbir jeli qoldanýshylary áıeldi qorǵap, tusaý kesýdiń tereń maǵynaǵa ıe ekenin, ári tek balalarǵa ǵana emes, eresekterge de arnalýy múmkin ekenin aıtty. Pikir qaldyrýshylardyń aıtýynsha, qazirgi zamanda bul salt-dástúr zamanaýı mazmunmen baıytylyp, eresekterge de beıimdelip oryndalýy múmkin.

«Adam óz aqshasyn qalaı jumsaıtynyn jáne ómirindegi mańyzdy sátterdi qalaı atap ótetinin ózi tańdaıdy. Tipti osyndaı erekshe tásilmen bolsa da», – deıdi bir pikir qaldyrýshy.