دۋلات تاستەكەي گارۆاردتى باعىندىرۋعا اتتاندى

بەلگىلى كاسىپكەر دۋلات تاستەكەي گارۆارد بيزنەس مەكتەبىندەگى وقۋىن اياقتاۋ ءۇشىن اقش-تىڭ بوستون قالاسىنا باعىت الدى. قازان ايىنىڭ سوڭىندا مەتسەنات الەمدەگى ۇزدىك وقۋ ورنىن ءتامامداپ, قولىنا ديپلومىن الماق.

«مەن كاسىپكەر رەتىندە TAS GROUP كومپانياسىنىڭ تابىسى مەن شىعىنىن عانا ەمەس, دامۋ باعىتتارىن ايقىن ءبىلۋىم كەرەك. ول ءۇشىن ءارتۇرلى سالادا – ماركەتينگ, HR, IT بولسىن, جاڭالىقتارى مەن تەندەنتسيالارىنان حاباردار بولۋىم قاجەت.

ءار العان ءبىلىمىم كاسىپكەر, ادام رەتىندە بىلىكتىلىگىمدى ارتتىرادى. ال بىلىكتىلىگىم ارتقان سايىن كومپانيانى باسقارۋ ءىسى جاقسارادى, ونى ماسشتابتاندىرۋ مۇمكىندىگى ۇلعايادى.كومپانيانىڭ دۇرىس باسقارىلۋى مەن ماسشتابتانۋى كوبىرەك پايدا اكەلۋگە مۇمكىندىك بەرەدى. ال بيزنەس-ءتىڭ ۇلعايۋى – مەنىڭ تۇلعا رەتىندە داۋلەتتى ادام قاتارىنا قوسىلۋىم.

جۇمىستى قولمەن ەمەس, باسپەن ىستەۋ ماڭىزدى. باسپەن ىستەۋ – ءبىلىمنىڭ ارقاسىندا ءوسۋ, ءبىلىمدى بىلىكتىلىككە اينالدىرۋ ارقىلى جوعارى دەڭگەيدەگى مامان رەتىندە قارجى تابۋ مۇمكىندىگىن ارتتىرۋ.

ادامنىڭ داۋلەتىن ارتتىرۋ ءۇشىن بىلىكتىلىگى ءوسۋى كەرەك, ونىڭ كوزى – ءبىلىم»,- دەدى دۋلات تاستەكەي Forbes باسىلىمىنا بەرگەن سۇحباتىندا.

ايتا كەتەيىك, گارۆارد بيزنەس مەكتەبىن ساناۋلى قازاقستاندىقتار تامامداعان.

ولاردىڭ اراسىندا ميلليونەر ايدىن راحىمباەۆ تا بار.