جاڭالىقتار
دۋلات تاستەكەي: “شىعىنداردىڭ تابىستان اسۋى – كەدەيلىكتىڭ فورمۋلاسى”
بەلگىلى مەتسەنات دۋلات تاستەكەي قارىزعا بەلشەسىنەن باتقان ادامداردىڭ نەلىكتەن نەسيەگە قايتا ورالاتىنىنا توقتالدى. ول كەدەيلىككە الىپ كەلەتىن فورمۋلالارمەن ءبولىستى.
مەتسەنات كوتەرگەن ماسەلەنىڭ ءبىرى – قازاقتىڭ تويىنا قاتىستى. دۋلات تاستەكەيدىڭ ايتۋىنشا, كوپ ادام جاعدايى جەتپەسە دە, قارىز الىپ, توي جاساۋعا قۇشتار.
“قازاقتىڭ تويى — ەرەكشە پروتسەسس قوي. قوناقتار كونۆەرتپەن, اقشامەن كەلەدى. ەگەر تويدى ۇيىمداستىرۋعا كەتكەن قاراجات كەلەتىن قاراجاتپەن تەپە-تەڭ تۇسسە, توي جاساۋعا بولاتىن شىعار. ال تىراشتانىپ جاساعان توي ودان سايىن شىعىنعا باتىرسا, ونداي تويدى جاساماۋ كەرەك. كورسەقىزارلىقپەن تەلەفوندى, گادجەتتى, كيىمدى, ءتىپتى ازىق-ت ۇلىكتى كرەديتكە الادى. نەگە? ويتكەنى, ءوزىنىڭ قاراجاتىن باسقا نارسەلەرگە جۇمساپ, تۇتىنۋشىلىق قارىزعا بەلشەسىنەن باتادى. ونداي ادامنىڭ نومينالدى تابىسى بولعانىمەن, ونىڭ تابىسى شىعىندارىنان اسپايدى”, — دەيدى دۋلات تاستەكەي.
كاسىپكەر تابىستىڭ شىعىنداردان كوپ بولۋى – بايلىقتىڭ, شىعىنداردىڭ تابىستان اسۋى – كەدەيلىكتىڭ فورمۋلاسى ەكەنىن ايتادى.
“ەگەر ادام ءوزىنىڭ شىعىنىن ازايتىپ, تابىسىن مەن بىلىكتىلىگىن ارتتىرۋعا قادام جاساسا, جاعدايىن جاقسارتا الادى. ءبىز وسىنى مەملەكەت شەشەتىن ماسەلە رەتىندە قاراستىرامىز, شىن مانىسىندە, بۇل – ءاربىر ادامنىڭ جەكە تاڭداۋى. وسىدان بىرنەشە جىل بۇرىن حالىقتىڭ نەسيەلەرىن كەشىرگەن ساتتەر بولدى. ال نەسيەسى كەشىرىلگەن ادامدار, قارىزىن جابا سالا, باسقاسىن الدى”, — دەدى مەتسەنات.
