جاڭالىقتار
ەگىزدىڭ سىڭارى FlyArystan كەسىرىنەن بوتەن قالادا قالىپ قويعان
فوتو: اشىق دەرەككوز
FlyArystan اۋە كومپانياسىنىڭ قىزمەتكەرلەرى تىركەۋ كەزىندە قاتەلىك جىبەرىپ, 12 جاستاعى ەگىزدىڭ سىڭارىن بوتەن قالادا ءبىر ءوزىن قالدىرىپ كەتكەن, دەپ حابارلايدى qandastar.kz
ەگىزدەردىڭ اناسى ورالدىق جازيرا ءمۋسيننىڭ سوزىنشە, 20 شىلدە كۇنى قىزدارى توبىمەن اقش-تان ءتىل كۋرسىنان استانا ارقىلى ۇشىپ كەلۋى كەرەك بولعان.
Qamshy.kz جازعانداي,تىركەۋ كەزىندە FlyArystan قىزمەتكەرلەرى قىزدارىنىڭ ءبىرى زاۋرەنى تىركەپ, زەرەنى تىركەمەگەن. ارتىنشا قىزمەتكەرلەر تەحنيكالىق اقاۋ بولعانىن ايتىپ, ونى دەرەۋ شەشىپ, ەكىنشى قىزدى ۇشاققا وزدەرى وتىرعىزاتىنىن ايتقان. بىراق توپ ورالعا زەرەسىز ۇشىپ كەتكەن. 12 جاسار قىز اۋەجايدا جالعىز قالىپ قويعان.
«كۇنى كەشە ادۆوكاتىمىز استانا اۋەجايىندا بولىپ, وعان تىركەۋ ۇستەلىنىڭ جانىندا قىزىمنىڭ ءۇش ساعات بويى جالىپ تۇرعان بەينە جازباسىن كورسەتتى. باسقا قالادا 12 جاستاعى بالام جالعىز ءوزى اۋەجايدا سابىلىپ, ماعان «ماما, مەن نە ىستەيمىن, قايدا بارامىن» دەپ جىلاعانىن ەستۋ قالاي اسەر ەتكەنىن ەلەستەتىڭىزشى» دەيدى جازيرا مۋسين.
ەگىزدىڭ سىڭارى وتباسىمەن تەك كەلەسى كۇنى قاۋىشقان. جابىرلەنۋشى تاراپ ازاماتتىق اۆياتسيا كوميتەتىنە ارىز ءتۇسىرىپ, ءتيىستى تۇلعالاردى جاۋاپكەرشىلىككە تارتۋدى سۇراپ وتىر.
اۆياكومپانيا جازيرا مۋسيننەن كەشىرىم سۇراپ, جاعدايدىڭ ءمان-جايىن ءجىتى تەكسەرەتىنىن, ونىڭ ناتيجەسى بويىنشا شارا قولداناتىنىن ءمالىم ەتكەن.
