«ەكىباستۇز گرەس-2-ءنى» جاڭعىرتۋ كەزىندەگى 1 ميلليارد تەڭگەنى جىمقىرۋ ءىسى: سوتتالۋشىلار اقتالىپ شىقتى

فوتو: samruk-energy.kz

ەكيباستۇزدا ەلدەگى ەڭ ءىرى ەلەكتر ەنەرگياسىن وندىرۋشىلەردىڭ ءبىرى سانالاتىن گرەس-2-ءنى جاڭعىرتۋ بارىسىندا ميللياردتاعان تەڭگە قاراجات جىمقىرۋ دەرەگىنە قاتىستى رەزونانستى ءىس بويىنشا سوت پروتسەسى اياقتالدى, دەپ جازدى qandastar.kz Stan.kz اقپارات اگەنتتىگىنە سىلتەمە جاساپ.

ايتا كەتەيىك, وتكەن جىلدىڭ اقپانىندا پاۆلودار وبلىسىنىڭ پروكۋراتۋراسى «ەكىباستۇز گرەس-2» اكتسيونەرلىك قوعامىندا قوماقتى قاراجات تالان-تاراجعا سالىنعانىن انىقتادى. بۇل قاراجات ءۇشىنشى ەنەرگوبلوكتى سالۋعا جانە ستانتسيانى كەڭەيتىپ, قايتا جاڭعىرتۋعا ارنالعان بولاتىن. راستالماعان جۇمىستاردىڭ جالپى سوماسى شامامەن 1 ميلليارد تەڭگە بولعان. وسى دەرەك بويىنشا قىلمىستىق كودەكستىڭ 189-بابى («سەنiپ تاپسىرىلعان بوتەن مۇلiكتi يەمدەنiپ الۋ نەمەسە تالان-تاراجعا سالۋ»)  بويىنشا ءىس قوزعالدى.

بۇل ءىس بويىنشا ءتورت ادامعا ايىپ تاعىلدى, ولاردىڭ ۇشەۋى سوتتا اقتالدى. ايىپتالۋشىلار قاتارىندا ستانتسيانىڭ بۇرىنعى ماتەريالدىق-تەحنيكالىق جابدىقتاۋ ءبولىمىنىڭ باستىعى ش., باسقارما توراعاسى ت., كۇردەلى قۇرىلىس باسقارماسىنىڭ باستىعى ب. جانە مەردىگەر ۇيىمنىڭ قارجى ديرەكتورى ۆ. بولدى.

ايىپتاۋشىلارعا قىزمەت بابىن پايدالانىپ, الدىن الا ءسوز بايلاسۋ ارقىلى اسا ءىرى كولەمدە سەنىپ تاپسىرىلعان م ۇلىكتى جىمقىردى دەگەن ايىپ تاعىلدى. سونىمەن بىرگە سوتتالۋشى ش.-عا «الاياقتىق» بابى بويىنشا دا ايىپ تاعىلدى.

ايىپتاۋ نۇسقاسىنا سايكەس, 2012–2014 جىلدارى ايىپتالۋشىلار باقىلاۋىنداعى فيرمالار ارقىلى روتورلى تيەگىش ماشيناعا بولىنگەن 953,6 ملن تەڭگەنى جانە بالشىق سورعىش كەمە ساتىپ الۋعا بولىنگەن 113,6 ملن تەڭگەنى جىمقىرعان. پروكۋروردىڭ ايتۋىنشا, بۇل جابدىقتار ءالى كۇنگە دەيىن پايدالانۋعا بەرىلمەگەن: روتورلى تيەگىش ماشينا ءالى جۇمىس ىستەمەيدى, كونۆەيەر تاسپالارى جوق, ىسكە قوسۋ-باپتاۋ جۇمىستارى جۇرگىزىلمەگەن. ال گرەس-2 شوتىنان 1,1 ملرد تەڭگەدەن استام قارجى «بىركۇندىك» فيرمالار ارقىلى جالعان اكتىلەرمەن شىعارىلعان.

ايىپتاۋ دەرەگىنە سايكەس, نەگىزگى ءرولدى ش. اتقارعان. ونىڭ سەرىگى رەتىندە پ. ەسىمدى قىرعىزستان تۋماسى اتالدى, وعان وتكەن جىلى سىرتتاي كۇدىكتى دەپ تانىلىپ, حالىقارالىق ىزدەۋ جاريالانعان.

ايىپتاۋ اكتىسى بىرنەشە رەت وزگەرتىلدى: مەملەكەتتىك ايىپتاۋشى اۋەلى جەتى كۇدىكتىنى اتادى, كەيىن ءتىزىم قىسقارىپ, ءتورت ادام قالدى. ايىپتالۋشىلار مەن ولاردىڭ قورعاۋشىلارىنىڭ قارسىلىعىنان سوڭ تاعى ءۇش ادام قايتا ەنگىزىلدى دە, باستى ۇيىمداستىرۋشى مەن سىبايلاستار ناقتىلاندى.

قورعاۋشىلاردىڭ ايتۋىنشا, 2013 جىلى گرەس-2 كوممەرتسيالىق كاسىپورىن بولعاندىقتان, مەملەكەت اكتسيالاردىڭ باقىلاۋ ۇلەسىنە يە بولماعان. بۇعان قوسا قورعاۋشىلار كۋاگەرلەردىڭ ايعاقتارىنىڭ ناقتىلىعان كۇمان كەلتىردى, ويتكەنى ولاردىڭ ءبىرازى ءارتۇرلى جىلدارى ءبىر-بىرىنە قاراما-قايشى كەلەتىن انىقتامالار بەرگەن.

ايىپتالۋشىلار ءوز كىناسىن مويىنداماي, اقتاۋدى تالاپ ەتتى.

پروكۋرور ولاردى كىنالى دەپ تانىپ, 7–8 جىلعا باس بوستاندىعىنان ايىرۋدى جانە 1,1 ملرد تەڭگە كولەمىندە زالالدى بىرلەسىپ وتەۋدى سۇرادى.

سوت ۇكىمى

«ش.-نى قىلمىستىق كودەكستىڭ 190-بابى, 4-ءبولىمى, 2-تارماعى («اسا ءىرى كولەمدەگى الاياقتىق») بويىنشا كىنالى دەپ تانىپ, بىراق ەسكىرۋ مەرزىمىنە بايلانىستى قىلمىستىق جاۋاپكەرشىلىكتەن بوساتىلسىن», – دەپ وقىدى ۇكىمدى ەكىباستۇز قالالىق سوتىنىڭ سۋدياسى ءاليا اتكەشوۆا.

قالعان ءۇش ايىپتالۋشى قىلمىس قۇرامىنىڭ بولماۋىنا بايلانىستى اقتالدى.

«جابىرلەنۋشىلەر مەن كۋالاردىڭ ايعاقتارىن, سونداي-اق ءىس بويىنشا جينالعان دالەلدەمەلەردى تالداي كەلە, سوت ولاردىڭ شىنايى ءارى زاڭدى ەكەنىن انىقتادى جانە ش-نىڭ ارەكەتتەرىن قىلمىستىق كودەكستىڭ-ءنىڭ 190-بابى, 4-ءبولىمى, 2-تارماعىنا قايتا سارالادى. روتورلى تيەگىش ماشيناعا قاتىستى ەپيزود بويىنشا ونىڭ كىناسى دالەلدەندى. ال بالشىق سورعىش كەمەگە قاتىستى ەپيزودتا كىناسى دالەلدەنبەگەندىكتەن, ول اقتالدى», – دەپ ءتۇسىندىردى سۋديا.

ول ستانتسيا وكىلدەرىنىڭ ش-عا كەلتىرىلگەن زالالدى وتەۋ جونىندەگى ازاماتتىق تالابىن دا ءىشىنارا قاناعاتتاندىردى. سونداي-اق سۋديا پروتسەسسۋالدىق زاڭبۇزۋشىلىقتارعا جول بەرىلگەنى ءۇشىن پروكۋراتۋرا اتىنا جەكە قاۋلى شىعاردى.

«بۇل ءىس 10 جىل بۇرىنعى دەرەك بويىنشا قارالدى. سوت پروتسەسى سەگىز ايدان استام ۋاقىتقا سوزىلدى. قورعاۋ تارابى كىناسىزدىكتى دالەلدەيتىن بارلىق ايعاقتى ۇسىنعانىمەن, پروكۋرور ايىپتاۋدان باس تارتپادى. ول ايىپتاۋ اكتىسىن ءۇش رەت وزگەرتىپ, سوتقا ارتۇرلى نۇسقا ۇسىندى. قۇقىق قورعاۋشىلار مەن پروكۋراتۋرانىڭ زاڭسىز ارەكەتتەرىنىڭ سالدارىنان مەنىڭ قورعاۋىمداعى ازامات 1,5 جىلدان استام ۋاقىت زاڭسىز قۋدالاۋعا ۇشىرادى», – دەدى ادۆوكات اسەم باكىمباەۆا.

سوتتا بەلگىلى بولعانداي, حالىقارالىق ىزدەۋدە جۇرگەن قىرعىز ازاماتى پ.-ءنىڭ ءىسى بولەك وندىرىسكە بولىنگەن, ول بويىنشا تەرگەۋ جالعاسادى. شەكارا قىزمەتىنىڭ دەرەگىنە سۇيەنسەك, ول ءۇش جىل بۇرىن وتباسىمەن بىرگە قازاقستاننان كەتىپ قالىپ, سول كۇيى ورالماعان.