Eks-mınıstr Muhamedıulyna tıesili mektep memleketke qaıtaryldy

Foto ©️ Tengrinews.kz / Turar Qazanǵapov

Burynǵy mádenıet mınıstri Arystanbek Muhamedıulyna tıesili sý jáne qoldanbaly sport túrleri boıynsha respýblıkalyq joǵary sport sheberligi mektebi memleketke qaıtaryldy, dep habarlaıdy Tengrinews.kz tilshisi.

Almaty qalasy Jetisý aýdany prokýratýrasynyń talap-aryzy boıynsha quny 1,2 mıllıard teńge bolatyn memlekettik múlik qaıtaryldy.

17 shildede Almaty qalasynyń Mamandandyrylǵan aýdanaralyq ekonomıkalyq sotynyń sý jáne qoldanbaly sport túrleri boıynsha Respýblıkalyq joǵary sport sheberligi mektebin satý jónindegi mámileni jaramsyz dep taný týraly sheshimi zańdy kúshine endi.

Cotta nysannyń naryqtyq qunyn 551 mln teńgege tómendetý kórinis tapqan zań buzýshylyqtar rastaldy.

Ákimshilik ǵımarattardyń, sport zaldarynyń jáne basqa da qurylystardyń 7,6 myń m2, sondaı-aq 4,9 ga jerdi quraıtyn mekteptiń múlkine, Arystanbek Muhamedıulymen affılıırlengen tulǵalarǵa tıesili «Nomad’s Land» JShS ıelik etken.

Eske salaıyq, burynǵy mádenıet mınıstri buǵan deıin eki is boıynsha aıypty dep tanylǵan. Áýeli Ulttyq mýzeıdegi jemqorlyq deregi boıynsha 8 jyl arqalasa, keıin sol jazany jeńildetý úshin advokaty arqyly para berip, taǵy aıypty boldy. Sonymen alǵashyndaǵy segiz jyl jazasyna taǵy úsh jyl qosylyp, 11 jylǵa sottaldy. Sot úshinshi is boıynsha da kináli dep tapqannyń ózinde, taǵy 12 jyl jaza qosylmaıdy. Zań boıynsha, aıyptalýshy kesilgen úsh jazanyń ishindegi eń aýyryn óteýge tıis.