«ەلدە ءۇي جالداپ تۇردىق»: «مىرجاقىپ. ويان, قازاق!» ءفيلمىنىڭ اۆتورلارى شەتەلگە كوشىپ كەتتى

«مىرجاقىپ. ويان, قازاق!» ءفيلمىنىڭ اۆتورلارى مۇرات ەسجان مەن ايەلى ايساۋلە ءابىلدا نەگە شەتەلگە كوشىپ كەتكەنىن ايتتى, — دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

بۇل تۋرالى پروديۋسەر ايساۋلە ءابىلدا Facebook-پاراقشاسىندا ءبولىستى.

«مالايزياعا نەگە كوشكەنىمىز تۋرالى كۇنىنە بىرنەشە ادامنان سۇراق كەلەدى, سونىڭ ءبىر جاۋابىن بەرىپ قويايىن دەپ شەشتىم. ارينە, بىرىنشىدەن, بىز جاڭا جوبامىزعا بار ىنتامىزدى ارناي الاتىنداي شىعارماشىلىق كۇي ىزدەپ كەلدىك. ەلدە ءۇيىمىز بەن وفيسىمىزدىڭ اراسى قاتتى الىس بولماسا دا, كادىمگىدەي ۋاقىتىمىزدى الاتىن. كەپتەلىس, باراتىن باسقا دا شارالار, توي, شاقىرىس بار, سونىمەن ۋاقىتتىڭ قالاي وتكەنىن بىلمەي قالىپ جۇردىك. ال ءبىزدىڭ جۇمىس ونداي ەركەلىكتى كوتەرمەيدى, سەبەبى دەدلاين دەگەن ءداۋ بار, ياعني سەرىكتەسىڭمەن كەلىسكەن ۋاقىتتا شارۋا ءبىتۋ كەرەك, ايتپەسە كەز كەلگەن ءىستى عاسىرلاپ ىستەي بەرۋگە بولادى. شارۋانىڭ ۋاقىتىلى ءبىتىپ, جۇمىستىڭ جاقسى جۇرۋىنە ەڭ جاۋاپتى تۇلعا — پروديۋسەر بولعاندىقتان, مەن بۇل ماسەلەنى بارىنشا قولايلى شەشۋگە تىرىستىم. ارينە, كوشە قالساڭ, ءىسىڭ بىتە قويادى دەگەن ءسوز ەمەس, باستىسى — نيەت جانە تىرىسۋ, قالعانىن ناتيجەدەن كۇتۋ», — دەيدى ول.

ونىڭ ايتۋىنشا, ەلدە ءۇي مەن وفيس جالداپ, بالالارىن اقىلى مەكتەپتە وقىتىپ جۇرگەن. ال مالايزيا بالالاردىڭ ءتىل ۇيرەنۋىنە دە قولايلى ەل بولىپ شىققان.

«ەكىنشىدەن, ەلدە ءبىز ونسىز دا ءۇي مەن وفيس جالداپ, بالالارىمىزدى اقىلى مەكتەپتە وقىتىپ جۇردىك. ارينە, وقۋ اقىسىنا 100 پايىز, 70 پايىز گرانت العاننىڭ وزىندە تاماعى مەن تاسىمالداۋىن عانا تولەۋگە ءار بالاعا كادىمگىدەي قاراجات كەتەتىن, وعان قوسا جىل سايىن قىسقى دايىندىق بار, ونىڭ دا ءوز شىعىنى جەتەرلىك, سونىڭ ءبارىن ەسەپتەي كەلە ءدال سونداي تولەمگە قاي مەملەكەتتەردە جاقسىراق جاعدايدا جۇمىس ىستەپ, بالالارىمىزعا قوسىمشا ءتىل ۇيرەتەتىندەي مۇمكىندىكتەر بار دەپ زەرتتەدىك. مالايزيادا ورتا ءبىلىم جۇيەسىنىڭ جاقسى دامىعانى مەن بالالارعا اعىلشىن, قىتاي تىلدەرىن مەڭگەرىپ شىعۋعا جايلى ورتانىڭ بولۋى دا شەشىمىمىزگە اسەر ەتتى», — دەپ جازعان ايساۋلە ءابىلدا.

ايساۋلە ءابىلدا مالايزياعا ۋاقىتشا كوشكەنىن ايتتى.

«ۇشىنشىدەن, جاڭا ەلدە تۇرىپ كورۋ — كوكجيەگىڭدى كادىمگىدەي كەڭەيتىپ جىبەرەدى عوي, سونى دا ەسكەرىپ, جۇمىس پەن ءومىردىڭ, بالا-شاعانى جەتكىزۋدىڭ اراسىندا ءوز دامۋىمىزعا دا دەم بەرەيىك دەگەن ويمەن ۋاقىتشا مالايزياعا كوشتىك. قازىرگى مەندەگى باستى تىلەك — وسى جوبانىڭ ءساتتى ءجۇرىپ كەتۋى جانە امان-ەسەن كورەرمەنمەن قاۋىشۋى بولىپ تۇر. وزدەرىڭىز بىلەتىندەي, ءبىزدىڭ كومپانيامىزدا تۇراقتى جۇمىس ىستەيتىن — ەكى ادام عانا بار, سول جالعىز ارىپتەسىمنىڭ ستسەناريى جاقسى شىقسا ەكەن دەپ ۋايىمداپ ءجۇرمىن. ارتىق سەكۋندىڭىز بولسا, سىزدەر دە ءبىزدى دۇعالارىڭىزعا قوسىپ, تىلەۋلەس بولا جۇرىڭىزدەر», — دەپ قورىتىندىلادى ول.