Elimizde baspana baǵasy 15 paıyz ósedi – sarapshylar

Foto: ashyq derekkóz

Sarapshylar elimizde kelesi jyly páter quny 10-nan 15 paıyzǵa deıin kóteriledi degen boljam aıtty. Bul týraly qandastar.kz aqparat agenttigi KTK arnasyna silteme jasap habarlaıdy.

Baspananyń qymbattaýynyń sebebi qurylys salasyna 12 paıyzdyq qosylǵan qun salyǵy qaıta engizilmek. Al qurylys kompanııalary sol salyqty qaltadan shyǵarmas úshin sharshy metr qunyna qosady deıdi mamandar. Sý jańa úılerdiń quny sharyqtasa, eski páterler de qymbattaıdy degen sóz.

12 paıyzdyq qun salyǵy degenimiz jańalyq emes. Eldegi qurylys kompanııalary sonaý 2001 jyly osy salyqtan bosatylǵan. Osylaısha úkimet úıdiń baǵasyn arzandatpaq boldy. Endi sol salyq keler jyldan bastap qaıta engizilgeli otyr. Bul baǵaǵa keri áser etedi deıdi sarapshylar.

Qurylys kompanııalaryna jeńildik berilgen 2001 jyldan bastap sý jańa baspananyń quny 21 ese qymbattapty. Qaıtarda bul san taǵy óskeli tur.

«Qazir qurylys kompanııasy úı salyp, orta eseppen 15 paıyz paıda tabady. Eger 12 paıyzdyq salyq engiziletin bolsa, qurylys kompanııasy nólge jumys isteıdi degen sóz. Sondyqtan olarda eki-aq baǵyt bar: paıdasyz isteıdi nemese sharshy metr baǵasyn kóteredi”, – deıdi Qazaqstan qurylysshylar odaǵy Astana fılıalynyń dırektory Vıacheslav Lazarev.

Árıne, ekinshi nusqany tańdaıtyny belgili. Osylaısha túbinde zardabyn tartatyn — qarapaıym tutynýshy. О́ıtkeni kelesi jyly jańa salynǵan úıler aspandaıtyn bolsa, sáıkesinshe, eski úılerdiń quny da qatarlasyp qymbattaıtynyna rıeltorlar senimdi.

«О́ıtkeni, birinshi sanattaǵy turǵyn úı baǵasy tym qymbat bolady. Sáıkesinshe, ekinshi sanattaǵy úıdiń ıesi ekinshi sanatty satyp, birinshi sanattaǵy páter alǵysy keledi ǵoı. Sáıkesinshe, ekinshi sanattaǵy úı baǵasy sol birinshi sanattaǵy úıdiń baǵasyna qaraı ózgeredi. Baǵasy ósse, satyp alý múmkindigi azaıady. Bul jalpy jyljymaıtyn múlik naryǵyna tikeleı áser etedi”, – deıdi rıeltor Shahrýh Asqarov.

Turǵyn úı naryǵynyń qandaı ózgeriske ushyraıtynyn ýaqyt kórsetedi. Biraq dál qazir páter baǵasy aıtarlyqtaı turaqtalyp qaldy deıdi rıeltorlar. Almatyda 40 sharshy metr bir bólmeli páterdiń quny shamamen 25-30 mıllıon teńgeniń tóńireginde. Endi 12 paıyzdyq salyq engizilse, dál sol úıdiń quny qanshaǵa shyǵatynyn kelesi jyly salystyryp kóremiz.

Eske salsaq, osyǵan deıin elimizde baspanany saqtandyrý mindetteletini týraly jazǵanbyz.