Elimizde bir jylda qarjy pıramıdasy boıynsha 68 qylmystyq is tergeldi

Foto: ashyq derekkóz

Jyl basynan beri QMA 20 mlrd teńgeden asa shyǵynmen qarjy pıramıdalaryn qurý jáne basqarý faktileri boıynsha 68 qylmystyq isti tergedi, dep jazdy qandastar.kz

Búgingi tańda 13 mlrd teńgeden astam qarajat óteldi.

Bul týraly QMA men Joǵary bilim jáne ǵylym mınıstrligimen birlesip elimizdiń 100-den astam joǵary oqý oryndary úshin uıymdastyrylǵan quqyqtyq mádenıet jáne qarjylyq saýattylyqty arttyrý jónindegi vebınar barysynda belgili boldy.

Shara «Tártipti ózińnen basta!» estafetasy aıasynda ótkizildi.

Agenttikte alaıaqtyq jobalardyń ómirlik ıklin jáne olarǵa tartylǵan salymshylar sanyn qysqartýǵa baǵyttalǵan «Qarjy pıramıdalaryna qarsy is-qımyl» arnaıy jobasy engizildi.

Aǵymdaǵy jyldyń basynan beri ınternet keńistiginde 47 qarjy pıramıdasy anyqtaldy.

Olarǵa qatysty áleýmettik jelilerde 300-ge jýyq chat jabylyp, shamamen 2 mıllıonǵa jýyq qatysýshy – áleýetti salymshylar bolǵan.

Osy jyly áleýmettik jelilerdi taldaý nátıjesinde qarjy pıramıdasy belgileri bar saıttarǵa 11,7 myńnan astam silteme buǵattaldy.

Vebınar barysynda qatysýshylarǵa jınaqtaryn salý kezinde nazar aýdarý qajet negizgi belgiler týraly aıtyldy:

• táýekeldersiz jáne kúsh-jigersiz joǵary tabys ýáde etý;
• jańa klıentterdi mindetti túrde tartý;
• ınternette belsendi jarnama jasaý;
• kompanııanyń Qazaqstan Respýblıkasynda tirkelmeýi nemese jaqyn arada tirkelýi;
• zańdyq súıemeldeýdiń bolmaýy (sharttyń bolmaýy nemese taraptardyń mindettemelerinsiz jasalýy);
• salymdardy qolma-qol aqshamen, krıptovalıýta arqyly nemese bankterdiń qatysýy bolmaıtyn tólem júıeleri arqyly qabyldaý.

Aıta keteıik, Agenttikte qarjy pıramıdalarynyń belgilerin tekserýge múmkindik beretin «Baiqa, piramida!» Telegram-boty iske qosýly.