ەلىمىزدە دەكرەتكە شىعاتىن ەر ادامدار كوبەيگەن

فوتو: اشىق دەرەككوز

بىلتىر ەلىمىزدە 277 مىڭ ادام بالا كۇتىمىنە بايلانىستى الەۋمەتتىك تولەم السا, سونىڭ 500-گە جۋىعى — ەر ادام, دەپ حابارلايدى qandastar.kz

«مەملەكەتتىك الەۋمەتتىك ساقتاندىرۋ قورى» اق مالىمەتىنشە, دەكرەتتىك دەمالىستا وتىرعان ەرلەردىڭ ۇلەسى پاۆلودار مەن سولتۇستىك قازاقستان وبلىسىندا جوعارى.

ماسەلەن پاۆلوداردا الەۋمەتتىك تولەم 2023 جىلى 7 865 ادامعا تاعايىندالعان. سونىڭ 40-ى — ەر ادام. وتكەن جىلى 7825 ايەل ومىرگە نارەستە اكەلسە, بالا كۇتىمىمەن 33 اكە ۇيدە وتىرعان.

سقو-دا بالا تۋ كورسەتكىشى ەكى جىلدان بەرى بىرقالىپتى, شامامەن 4,5 مىڭ نارەستە دۇنيەگە كەلگەن.

الايدا 2023 جىلى 10 ەر ادام, بىلتىر 18 ەر ادام دەكرەتتىك دەمالىسقا شىققان. ۇلەسى — 0,5%.

بۇدان كەيىن 0,3% كورسەتكىشپەن الماتى, استانا قالالارى جانە جامبىل وبلىسى كەلەدى.

قىزىلوردا مەن باتىس قازاقستان وبلىستارىندا بالا كۇتىمىمەن ۇيدە وتىراتىن ەرلەردىڭ سانى وتە از.

قىزىلوردادا بىلتىر شامامەن 14,7 مىڭ ايەل بوسانعان, ەكى جاعدايدا عانا بالا كۇتىمىنە بايلانىستى ەر ادامدار ۇيدە وتىرعان.

بالا تۋ كورسەتكىشى بويىنشا الدا تۇرعان تۇركىستان وبلىسىندا بىلتىر 37 مىڭ ءسابي دۇنيەگە كەلىپ, 29 ەر ادام دەكرەتتىك دەمالىسقا شىقتى.

جالپى بىلتىر قور بالا كۇتىمىنە بايلانىستى كىرىسىنەن ايىرىلعاندارعا 404,1 ملرد تەڭگە الەۋمەتتىك تولەم جاساعان.

مامانداردىڭ ايتۋىنشا, قازىر بالا تۋعاننان كەيىن بالانىڭ اتا-اناسىنىڭ بىرەۋى بىرجولعى الەۋمەتتىك مەملەكەتتىك جاردەماقى الا الادى. ءبىرىنشى-ءۇشىنشى بالاعا — 38 اەك, ءتورتىنشى بالادان كەيىن 63 اەك مولشەرىندە تولەم جاسالادى.

جۇمىس ىستەيتىن اناسىنا نەمەسە اكەسىنە 1,5 جاسقا دەيىن بالا كۇتىمىنە قوردان الەۋمەتتىك تولەم جۇرگىزىلەدى.

ءبىرىنشى بالاعا — 5,76 اەك, ەكىنشى بالاعا — 6,81 اەك, ءۇشىنشى بالاعا — 7,85 اەك, ءتورتىنشى بالادان باستاپ 8,9 اەك مولشەرىندە تولەنەدى.