ەلىمىزدە مىندەتتى اسكەري قىزمەتتى جويۋعا قاتىستى پەتيتسيا جاريالاندى

فوتو: اشىق دەرەككوز

قازاقستاندا مىندەتتى اسكەري قىزمەتتى الىپ تاستاۋدى تالاپ ەتەتىن پەتيتسيا جاريالاندى. ول قازاقستان قورعانىس مينيسترلىگىنە جولداندى. بۇل تۋرالى qandastar.kz  حابارلايدى.

پەتيتسيا اۆتورلارى اسكەردە بولىپ جاتقان قايعىلى وقيعالارعا نارازى. ولار اتاپ كورسەتكەن باستى ماسەلە – اسكەردەگى الىمجەتتىك.

“قازاقستان ارمياسىنداعى قايعىلى وقيعالاردىڭ نەگىزگى سەبەپتەرىنىڭ ءبىرى «الىمجەتتىك». اسكەري قىزمەتكە شاقىرىلعان جاس جىگىتتەر جوعارى وفيتسەرلەردىڭ زورلىق-زومبىلىعى مەن قىسىمىنا ءجيى ۇشىرايدى. بۇل پسيحولوگيالىق جاراقاتقا, ءتىپتى ءوز-وزىنە قول جۇمساۋعا دەيىن الىپ بارادى. ەكىنشىدەن, ساربازدار اسكەرگە ءتيىستى دايىندىقسىز بارادى. ۇشىنشىدەن, اسكەردەگى مەديتسينالىق باقىلاۋ مەن قاۋىپسىزدىك ماسەلەسى دە اقساپ تۇر”, – دەلىنگەن پەتيتسيادا.

مەديتسينالىق باقىلاۋدىڭ جەتكىلىكسىزدىگى دە شەت قالماعان.

«كوپتەگەن جاستار اسكەري قىزمەتكە بايلانىستى پسيحولوگيالىق قىسىمدى كوتەرە المايدى. پسيحولوگيالىق قولداۋدىڭ جوقتىعى مەن كومانديرلەر تاراپىنان تۇسىنبەۋشىلىك بۇل ماسەلەنى ودان سايىن شيەلەنىستىرەدى. سونىڭ سالدارىنان ساربازدار اراسىندا ءوز-وزىنە قول جۇمساۋ جاعدايلارى تىركەلەدى», – دەدى پەتيتسيا اۆتورى.

پەتيتسيا epetition.kz سايتىندا جاريالانعان. ول 4 قازانعا دەيىن تالقىلاۋدا بولادى.

ەسكە سالساق, بۇعان دەيىن ماڭعىستاۋ وبلىسىنداعى «ويماشا» پوليگونىندا «باتىس» وڭىرلىك قولباسشىلىعى بولىمدەرىنىڭ جيىنى كەزىندە سارباز كوز جۇمعانى تۋرالى حابارلاعان ەدىك. 9 قىركۇيەكتە باس اسكەري پروكۋراتۋرا باتىس وڭىرلىك اسكەري-تەرگەۋ باسقارماسىنىڭ قاساقانا كىسى ءولتىرۋ فاكتىسى بويىنشا سوتقا دەيىنگى تەرگەۋدى باستاعانىن مالىمدەگەن.