ەلىمىزدە جارتىجىلدىق قورىتىندىسى بويىنشا ازىق-ت ۇلىك باعاسى تومەندەگەن

جارتىجىلدىق قورىتىندىسى بويىنشا الەۋمەتتىك ماڭىزى بار ازىق-ت ۇلىك تاۋارلارى باعاسىنىڭ تۇراقتى دەفلياتسياسى بايقالادى: ماۋسىمدا ورتاشا باعا يندەكسى 0,3%-عا, ال جىل باسىنان بەرى جالپى 0,2%-عا تومەندەدى. باعانىڭ تومەندەۋ ءۇردىسى جالعاسۋدا.

ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆانىڭ ايتۋىنشا, كەيىنگى اپتادا باعالار ورتاشا تاعى 0,1%-عا تومەندەگەن. اسىرەسە, 9 تاۋار بويىنشا: ءسابىز (1,5%), قاراقۇمىق جارماسى (0,8%), ۇن (0,7%), ءسۇت (0,5%), تاۋىق ەتى (0,2%), كۇرىش, سيىر ەتى, تۇز جانە قانت (0,1%).

باعانىڭ تومەندەۋى 10 وبلىستا بايقالادى. ايتارلىقتاي تومەندەۋ ماڭعىستاۋ وبلىسىندا (0,4%) جانە پاۆلودار وبلىسىندا (0,3%) بايقالعان.

اۋىل شارۋاشىلىعى ۆيتسە-ءمينيسترى ەربول تاسجۇرەكوۆ وڭىرلەردەگى ەرتە پىسەتىن ونىمدەرگە كەلىسىمشارت جاساۋ بارىسىن باياندادى. قازىرگى ۋاقىتتا اكىمدىكتەر ماۋسىم-شىلدە ايلارىنا ەرتە پىسەتىن كوكونىستەرگە 37 مىڭ توننا كولەمىندە فورۆاردتىق كەلىسىمشارتتار جاساستى.

ۆيتسە-مينيستر 1 تامىزعا دەيىن وڭىرلەر كۇزگى ءونىمدى فورۆاردتىق ساتىپ الۋ اياسىندا اۋىل شارۋاشىلىعى وندىرۋشىلەرىن قارجىلاندىرۋ قاجەتتىگىن, فەرمەرلەردىڭ جەڭىلدەتىلگەن قاراجاتتى ۋاقىتىلى الۋىن قامتاماسىز ەتۋ كەرەك ەكەنىن اتاپ ءوتتى.