جاڭالىقتار
ەلنۇر بەيسەنباەۆ ققس-عا قاتىستى ايتتى
فوتو: اشىق دەرەككوز
ماجىلىستەگى «اماNات» فراكتسياسىنىڭ جەتەكشىسى, دەپۋتات ەلنۇر بەيسەنباەۆ بۇگىن ۇسىنىلعان سالىق كودەكسىنىڭ جوباسىن ازىرلەۋدە پارتيا دەپۋتاتتارى جۇمىلا جۇمىس ىستەگەنىن جەتكىزدى, دەپ جازدى qandastar.kz
«ەڭ الدىمەن, ەل بيۋدجەتىنىڭ كىرىسىن ارتتىرۋدا ىشكى كوزدەردى بارىنشا ءتيىمدى پايدالانۋ, سالىقتىق جەڭىلدىكتەردى قايتا قاراۋ ماڭىزدى», – دەدى ول.
دەپۋتات جاڭا سالىق كودەكسىنىڭ جوباسىندا جەر قويناۋىن پايدالانۋشىلارعا وتە كوپ سالىقتىق جەڭىلدىكتەر ۇسىنىلعانىن ايتتى.
«ماسەلەن, قولدانىستاعى كەن ورىندارى بويىنشا جەر قويناۋىن پايدالانۋشىلار پايدالى قازبالاردى ءوندىرۋ سالىعىنان بوساتىلعان. بۇل دەگەنىڭىز – 100 ميلليارد تەڭگەدەي قاراجات», – دەدى ول.
ودان ءارى دەپۋتات سالىق جەڭىلدىكتەرىنىڭ قانشالىقتى ماڭىزدى ەكەنىن ءتۇسىندىردى.
«سول سياقتى قاتتى پايدالى قازبالاردى وندىرۋشىلەر دە ەڭبەكاقى تولەۋ قورىنان باسقا بارلىق سالىقتان بوساتىلعان. بۇل دا قىرۋار قاراجات. ءبىر عانا «قازاقمىستىڭ» ەكى جوباسى بويىنشا 5 جىلدا 343 ملرد تەڭگە جوعالتادى ەكەنبىز. وسى تەكتەس باسقا كومپانيالاردىڭ جەڭىلدىگى قانشا سوما بولاتىنىن ەلەستەتە بەرىڭىزدەر. ول تريلليونداعان تەڭگەنى قۇراۋى مۇمكىن», — دەدى ول.
بەيسەنباەۆ سونىمەن قاتار, سالىق رەفورماسىنىڭ ناتيجەسىندە بيۋدجەتكە 4 تريلليون تەڭگە كىرىس تۇسەدى دەگەن بولجامنىڭ كۇمان تۋعىزىپ وتىرعانىن اتاپ ءوتتى.
«بۇل بولجامنىڭ ناقتى ەسەپ-قيسابى جوق. مۇنىڭ كۇمان تۋدىرۋى زاڭدى. وسى كەلەلى ماسەلەنى دە جان-جاقتى زەرتتەۋىمىز قاجەت», — دەدى دەپۋتات.
ۇلتتىق قور ماسەلەسىنە دە توقتالعان ول بيۋدجەتتى تولتىرۋ اسا ماڭىزدى مىندەت ەكەنىن دە جەتكىزدى.
«قازىر جاھاندىق تۋربۋلەنتتىك جاعدايدا ءومىر ءسۇرىپ جاتىرمىز. الەمدە ساۋدا, تاريفتىك شيەلەنىستەر ورىن الۋدا. وسىنداي جاعدايدا وڭتايلى سالىق رەفورماسىن جۇرگىزۋ وڭاي ەمەس ەكەنىن تۇسىنەمىز. ۇكىمەت الدىندا بيۋدجەت تاپشىلىعىن تولتىرۋ مىندەتى تۇرعانىن دا بىلەمىز», — دەپ مالىمدەدى.
ەلنۇر بەيسەنباەۆ ءسوزىنىڭ سوڭىندا «اماNات» فراكتسياسىنىڭ سالىق زاڭناماسىنىڭ كۇماندى تۇستارىن بىرگە تالقىلاعانىن ايتتى.
«فراكتسيا سالىق زاڭناماسىن جەتىلدىرۋ ءۇشىن 7 باعىت بويىنشا ۇسىنىس بەرگەن ەدى. ونىڭ دا باسىم بولىگى ۇكىمەتتەن قولداۋ تاپتى. ونىڭ ىشىندە دەنساۋلىق ساقتاۋ سالاسى بويىنشا بيۋدجەتتىك شىعىستار, الەۋمەتتىك ماڭىزى بار ازىق-ت ۇلىك تاۋارلارىنىڭ 19 ءتۇرى, وتاندىق كىتاپ شىعارۋ, ارحەولوگيا سالاسى قوسىمشا قۇن سالىعىنان بوساتىلدى», — دەپ فراكتسيانىڭ قول جەتكىزگەن ناتيجەلەرىنە توقتالدى.
سونىمەن قاتار, شاعىن جانە ورتا كاسىپكەرلىك سۋبەكتىلەرى ءۇشىن ارنايى سالىق رەجيمى ەنگىزىلگەنىن اتاپ ءوتتى.
«نارىقتا ادال ەڭبەك ەتىپ, قوعام قاجەتىن وتەپ جۇرگەن كاسىپكەرلەرگە جانە حالىققا سالماق تۇسپەيتىن بولدى», — دەدى ول.
قورىتىندىلاي كەلە, ەلنۇر بەيسەنباەۆ «اماNات» فراكتسياسىنىڭ جاڭا سالىق كودەكسىنىڭ ءبىرىنشى وقىلىمىن قولدايتىنىن جانە ارىپتەستەرىن دە قولداۋعا شاقىراتىنىن ايتتى.
