Elnur Beısenbaev QQS-ǵa qatysty aıtty

Foto: ashyq derekkóz

Májilistegi «AMANAT» frakııasynyń jetekshisi, depýtat Elnur Beısenbaev búgin usynylǵan Salyq kodeksiniń jobasyn ázirleýde partııa depýtattary jumyla jumys istegenin jetkizdi, dep jazdy qandastar.kz

«Eń aldymen, el bıýdjetiniń kirisin arttyrýda ishki kózderdi barynsha tıimdi paıdalaný, salyqtyq jeńildikterdi qaıta qaraý mańyzdy», – dedi ol.

Depýtat jańa Salyq kodeksiniń jobasynda jer qoınaýyn paıdalanýshylarǵa óte kóp salyqtyq jeńildikter usynylǵanyn aıtty.

«Máselen, qoldanystaǵy ken oryndary boıynsha jer qoınaýyn paıdalanýshylar paıdaly qazbalardy óndirý salyǵynan bosatylǵan. Bul degenińiz – 100 mıllıard teńgedeı qarajat», – dedi ol.

Odan ári depýtat salyq jeńildikteriniń qanshalyqty mańyzdy ekenin túsindirdi.

«Sol sııaqty qatty paıdaly qazbalardy óndirýshiler de eńbekaqy tóleý qorynan basqa barlyq salyqtan bosatylǵan. Bul da qyrýar qarajat. Bir ǵana «Qazaqmystyń» eki jobasy boıynsha 5 jylda 343 mlrd teńge joǵaltady ekenbiz. Osy tektes basqa kompanııalardyń jeńildigi qansha soma bolatynyn elestete berińizder. Ol trıllıondaǵan teńgeni quraýy múmkin», — dedi ol.

Beısenbaev sonymen qatar, salyq reformasynyń nátıjesinde bıýdjetke 4 trıllıon teńge kiris túsedi degen boljamnyń kúmán týǵyzyp otyrǵanyn atap ótti.

«Bul boljamnyń naqty esep-qısaby joq. Munyń kúmán týdyrýy zańdy. Osy keleli máseleni de jan-jaqty zertteýimiz qajet», — dedi depýtat.

Ulttyq qor máselesine de toqtalǵan ol bıýdjetti toltyrý asa mańyzdy mindet ekenin de jetkizdi.

«Qazir jahandyq týrbýlenttik jaǵdaıda ómir súrip jatyrmyz. Álemde saýda, tarıftik shıelenister oryn alýda. Osyndaı jaǵdaıda ońtaıly salyq reformasyn júrgizý ońaı emes ekenin túsinemiz. Úkimet aldynda bıýdjet tapshylyǵyn toltyrý mindeti turǵanyn da bilemiz», — dep málimdedi.

Elnur Beısenbaev sóziniń sońynda «AMANAT» frakııasynyń salyq zańnamasynyń kúmándi tustaryn birge talqylaǵanyn aıtty.

«Frakııa salyq zańnamasyn jetildirý úshin 7 baǵyt boıynsha usynys bergen edi. Onyń da basym bóligi Úkimetten qoldaý tapty. Onyń ishinde densaýlyq saqtaý salasy boıynsha bıýdjettik shyǵystar, áleýmettik mańyzy bar azyq-túlik taýarlarynyń 19 túri, otandyq kitap shyǵarý, arheologııa salasy qosymsha qun salyǵynan bosatyldy», — dep frakııanyń qol jetkizgen nátıjelerine toqtaldy.

Sonymen qatar, shaǵyn jáne orta kásipkerlik sýbektileri úshin arnaıy salyq rejımi engizilgenin atap ótti.

«Naryqta adal eńbek etip, qoǵam qajetin ótep júrgen kásipkerlerge jáne halyqqa salmaq túspeıtin boldy», — dedi ol.

Qorytyndylaı kele, Elnur Beısenbaev «AMANAT» frakııasynyń jańa salyq kodeksiniń birinshi oqylymyn qoldaıtynyn jáne áriptesterin de qoldaýǵa shaqyratynyn aıtty.