جاڭالىقتار
«ەم الىپ جاتقان ادامعا قاتىگەزدىك تانىتتىق»: بالاەۆا سارا نازارباەۆا تۋرالى ايتتى
مادەنيەت جانە اقپارات ءمينيسترى ايدا بالاەۆا سارا نازارباەۆاعا قاتىستى اقپاراتتىق اعىنداردى سىنعا الدى. ونىڭ ايتۋىنشا, ەم الىپ جاتقان ادام تۋرالى راستالماعان اقپارات تاراتۋ — ادامي تۇرعىدان دۇرىس ەمەس ارەكەت, دەپ حابارلايدى Qandastar.kz اقپارات پورتالى.
«مەنىڭشە, ءبىز ەم الىپ جاتقان ادامعا وتە قاتىگەزدىك تانىتتىق. شىنىمدى ايتسام, بۇل ءىستىڭ ەگجەي-تەگجەيىن بىلمەيمىن, ويتكەنى بۇل – ادامنىڭ جەكە ءومىرى. بىراق ادام ءولدى دەگەن اقپاراتتى تاراتۋ – بۇل قاتىگەزدىك», – دەدى مينيستر جۋرناليستەرگە بەرگەن سۇحباتىندا.
ايدا بالاەۆا رەسمي مالىمەتتەردى كۇتپەي, بولجام نەگىزىندە جاڭالىق تاراتۋدىڭ قاۋىپتى ەكەنىن اتاپ ءوتتى. ول نۇرسۇلتان نازارباەۆتىڭ ءباسپاسوز حاتشىسى ايدوس ۇكىبايدىڭ سارا الپىسقىزىنىڭ قايتىس بولماعانىن رەسمي تۇردە جوققا شىعارعانىن «دۇرىس قادام» دەپ باعالادى.
«ەگەر قايتىس بولسا, رەسمي تۇسىنىكتەمە مىندەتتى تۇردە بەرىلەر ەدى. اقپاراتتى ءاردايىم سەنىمدى دەرەككوزدەردەن الۋ كەرەك», – دەدى مينيستر.
مينيستردەن سارا نازارباەۆاعا قاتىستى ناقتى دەرەكتەردىڭ نە سەبەپتى بەرىلمەي وتىرعانى جونىندە دە سۇرالدى. بۇل سۇراققا جاۋاپ بەرە وتىرىپ, ايدا بالاەۆا:
«ءبىز دە ەگجەي-تەگجەيگە قانىق ەمەسپىز», – دەپ قىسقا قايىردى.
