جاڭالىقتار
ەم-شارا كابينەتىندە انتيبيوتيك سالدىرعان ەكى ەر ادام قايتىس بولدى
فوتو: pixabay
تارازدا ەم-شارا كابينەتىنە بارىپ انتيبيوتيك سالدىرعان ەكى ەر ادام بىردەي ومىرىمەن قوشتاستى, — دەپ حابارلايدى دەپ حابارلايدى qandastar.kz كتك تەلەارناسىنا سىلتەمە جاساپ.
اراعا بىرەر كۇن سالىپ قايتالانعان قايعىلى وقيعا بولعان ورتالىقتاردىڭ ليتسەنزياسى بولماعانى انىقتالعان. قازىر تارازداعى بارلىق پروتسەدۋرالىق كابينەت تەكسەرىلىپ جاتىر.
29 جاستاعى يسلامبەك پويىزدا جولسەرىك بوپ جۇمىس ىستەگەن. تۋىستارى ول ساپارعا شىعار الدىندا تاماعىن شايدىرماق بولعانىن ايتادى. الايدا قولىندا دارىگەردىڭ نۇسقاۋلىعى بولماعان. تەلەارنانىڭ جازۋىنشا, سوعان قاراماستان, سىناما جاساماي, ناۋقاسقا بىردەن ەكپە سالىنعان. انتيبيوتيكتى كوتەرە الماعان ول ەس-تۇسىنەن ايىرىلىپتى.
مارقۇمنىڭ اكەسى ۇلىنىڭ مەزگىلسىز ولىمىنە ەم-دوم كابينەتىنىڭ مەيىربيكەسىن كىنالاپ وتىر. انىقتالعانداي, جۇمىس ىستەۋگە رۇقساتى جوق مەكەمەنىڭ قىزمەتكەرىندە ناۋقاسقا نۇسقاۋلىق بەرىپ, ەكپە سالۋعا زاڭدى قۇقىعى بولماعان.
«بالا سول جەردە 15 مينۋتتاي قينالعان. قينالعان كەزىندە ەشبىر مەديتسينا قىزمەتكەرى كومەك جاساماي, بىلگەنىن ىستەگەن. بۇل جەردە العاشقى كومەك كورسەتۋ ءۇشىن ادرەنالين دە بولماعان جانە العاشقى كومەككە پرەپاراتتار دا بولماعان», — دەيدى تەمىرحان ۇسەنوۆ.
ال ەم-شارا بولمەسىنىڭ يەسى مارقۇمنىڭ ولىمىنە «ەش قاتىسىمىز جوق» دەيدى. ايتۋىنشا, ولار ناۋقاسقا قولىنان كەلگەن بار امالىن جاساعان.
«ۆيدەودان كورگەندەرىڭىزدەي, ول باسىندا قيمىلداپ جاتقان. الايدا جەدەل جاردەم بريگاداسى ۋاقىت وتكىزىپ الدى. ولار كەلە سالا, ەكگ اپپارتىن قويا باستاعان. ونىڭ نە قاجەتى بار? ءبىز ولاردى الدىن الا انتيبيوتيككە رەاكتسيا بولىپ جاتقانىن ەسكەرتتىك», — دەيدى ەم-شارا بولمەسىنىڭ يەسى اديليا اقىلوۆا.
ءدال وسىنداي جاعداي اراعا بەس كۇن سالىپ باسقا ەمدەۋ ورتالىعىندا قايتالانعان. 50 جاستاعى ەرلان اتابەكوۆ دارىگەردىڭ نۇسقاۋىمەن ءدارى-دارمەك الىپ ەمشارا ورتالىعىنا بارعان. الايدا مارقۇمنىڭ جۇبايى ونداعى قىزمەتكەرلەر سىناما ەكپەنى قولىنا ەمەس, جامباسىنا بىردەن سالىپ جىبەرگەن دەيدى .
«مۇندا كۇيەۋمىز ەكەۋىمىز بىرگە كەلىپ, اقىرى مەن ونىڭ ءولى دەنەسىن الىپ قايتتىم. سوت-مەديتسينالىق ساراپتاما كۇيەۋىمنىڭ انافيلاكتيكالىق شوكتان قايتىس بولعانىن دالەلدەدى. قازىر بىلىكسىز مامانداردىڭ كەسىرىنەن ەكى بالاممەن جەسىر قالدىم», — دەيدى مارقۇمنىڭ جارى ءمولدىر مەكەمتاس.
ونىڭ ايتۋىنشا, بۇل جەردەگى مەديتسينا قىزمەتكەرلەرى بۇل جاعدايدا نە ىستەۋ كەرەك ەكەنىن دە بىلمەيدى. جەدەل جاردەم كەلگەنشە, مەدبيكەلەر ەش شارا قولدانباعان دەيدى ول. جانساقتاۋ بريگاداسى كەلگەنشە, ونىڭ كۇيەۋى وسىندا جاتىپ جان تاپسىرعان. قايعىلى جاعدايدان كەيىن بۇل ورتىلىقتىڭ ەسىگىنە ق ۇلىپ سالىنىپتى.
«بۇل ەم-دوم كابينەتتەرىنىڭ ەكپە پروتسەدۋراسىن جاساۋعا ارنايى ليتسەنزياسى بولماعان. اسىرەسە بۇلشىق ەتكە جانە كوكتامىرعا ەكپە سالۋعا ارنايى دايىندىقتان وتكەن مامان بولۋعا ءتيىس. الايدا مەيىربيكەلەردىڭ ونداي قۇقىعى جوق. سوندىقتان قازىر بۇل ورتالىقتار تەكسەرىسكە جابىلدى», — دەيدى جامبىل وبلىسى مەديتسينالىق قىزمەت جانە فارماتسەۆتيكانى باقىلاۋ دەپارتامەنتى باسشىسىنىڭ مىندەتىن اتقارۋشى گۇلميرا بازارحانوۆا.
سوڭعى قايعىلى جاعدايدان كەيىن بۇكىل مەكەمەلەر تەكسەرىلىپ جاتىر. تاراز قالاسىندا پروتسەدۋرا كابينەتتەرى كارانتين كەزىندە جاپپاي اشىلا باستاعان. ماماندار ونىڭ كوپشىلىگىندە ارنايى ليتسەنزيا جوق دەپ وتىر. ال پوليتسيا دەپارتامەنتى ەكى ادامنىڭ ءومىرىن جالماعان قايعىلى وقيعاعا بايلانىستى قىلمىستىق ءىس قوزعادى. قازىر سوتقا دەيىنگى تەرگەۋ ءجۇرىپ جاتىر.
