ەڭبەك مينيسترلىگى 2029 جىلعا قاراي 1,7 ملن قازاقستاندىقتىڭ جالاقىسىن كوتەرۋگە ۋادە بەردى

قر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا مانساپ ورتالىقتارى قىزمەتكەرلەرىنىڭ تابىسىن ارتتىرۋ جوسپارى تۋرالى ايتتى,-دەپ حابارلايدى Qandastar.kz

«مەملەكەت باسشىسىنىڭ تاپسىرمالارىن ىسكە اسىرۋ ماقساتىندا مانساپ ورتالىقتارىندا ماماندارعا ەڭبەكاقى تولەۋدىڭ جۇمىسقا ورنالاستىرۋ ناتيجەلەرىنە قاراي جاڭا جۇيەسىن ەنگىزۋ تاسىلدەرى ازىرلەندى.

ۇسىنىلىپ وتىرعان ەڭبەكاقىنى ەسەپتەۋ ادىستەمەسى جۇمىس ناتيجەسىنە سايكەس ازىرلەنگەن, ياعني ازاماتتاردى جۇمىسقا ورنالاستىرۋعا باعىتتالعان مانساپ ورتالىقتارى قىزمەتكەرلەرىنىڭ بىلىمىنە, داعدىسىنا بايلانىستى «كەيس-مەنەدجمەنت» ءپرينتسيپىن ەنگىزە وتىرىپ جاسالادى.

پيلوتتىق جوبانى جۇزەگە اسىرۋ ءۇشىن ءبىر-بىرىنە ۇقسامايتىن ءۇش ايماق تاڭدالدى: تۇركىستان, باتىس قازاقستان جانە قوستاناي وبلىستارى», – دەدى سۆەتلانا جاقىپوۆا ۇكىمەت وتىرىسىندا.

ول جوعارىدا اتالعان باعىتتارداعى جۇمىس ەلىمىزدە ساپالى جۇمىس ورىندارىنىڭ سانىن ارتتىرىپ, جۇمىسپەن قامتۋ قۇرىلىمىن جاقسارتۋعا مۇمكىندىك بەرەتىنىن باسا ايتتى. «2029 جىلعا قاراي ەكونوميكا 3,8 ميلليون ساپالى جۇمىس ورنىن (جۇمىسپەن قامتۋدىڭ جالپى قۇرىلىمىنىڭ 45 پايىزى) قامتاماسىز ەتەدى دەپ بولجانۋدا. بۇل 1,7 ميلليون ازاماتتىڭ تابىسىن ورتاشا جالاقىدان جوعارى دەڭگەيگە كوتەرۋگە مۇمكىندىك بەرەدى», – دەپ قوستى مينيستر.