جاڭالىقتار
ەندى ءان ۇرلاعاندار 6 جىلعا سوتتالۋى مۇمكىن
فوتو: اشىق دەرەككوز
ەلىمىزدە بىرەۋدىڭ ءانىن رۇقساتسىز ورىنداعاندارعا 300 مىڭ تەڭگەگە دەيىن ايىپپۇل سالىنىپ, 6 جىلعا دەيىن باس بوستاندىعىنان ايىرىلادى, دەپ حابارلادى Ulysmedia.kz 31 ارناعا سىلتەمە جاساپ.
ادىلەت مينيسترلىگى اۆتورلىق قۇقىققا قاتىستى اكىمشىلىك جاۋاپكەرشىلىك ەنگىزۋدى قاراستىرىپ جاتىر.
جاڭا زاڭ جوباسىندا اۆتوردىڭ كەز كەلگەن تۋىندىسىن رۇقساتسىز الىپ, ءوز ماقساتىنا پايدالاناتىندارعا جازانى كۇشەيتۋ قاراستىرىلعان. بۇل باستامامەن كومپوزيتور ءازيز بالتابەك ۇلى دا قولداپ وتىر.
بىزدە كوپ جاعدايدا اندەردى رۇقساتسىز الادى. ءتىپتى, كاۆەر بولعان كۇننىڭ وزىندە اۆتوردان ءبىر اۋىز رۇقساتىن الۋ كەرەك. TikTok-قا جاي شىعارا سالدىق قوي دەگەن سياقتى ءجۇردىم-باردىم قاراۋعا بولمايدى, – دەيدى كومپوزيتور.
مەيرامحانالار مەن كاراوكەدە ورىنداۋشى بەلگىلى ءبىر اۆتوردىڭ تۋىندىسىن شىرقاۋ ءۇشىن مىندەتتى تۇردە ۇجىمدىق ۇيىمدارمەن شارت جاساسۋعا ءتيىس. شارتقا سايكەس, شىعارما يەسىنە اي سايىن سىياقى بەرۋ مىندەتتەلەدى.
ادىلەت مينيسترلىگى زياتكەرلىك مەنشىك قۇقىعى دەپارتامەنتىنىڭ باس ساراپشىسى بوتاگوز ساتجانوۆانىڭ ايتۋىنشا جاڭا زاڭ جوباسى ازىرگە پىسىقتالىپ جاتىر.
