ەندى يپوتەكاسى بار قازاقستاندىقتار نەسيە تولەۋدى ۋاقىتشا توقتاتا الادى

فوتو: istockphoto.com

ەندى يپوتەكاسى بار قازاقستاندىقتار قارجىلاي قيىندىقتارعا تاپ بولسا, قارىزىن تولەۋدى ۋاقىتشا توقتاتا الادى, دەپ جازدى qandastar.kz

بۇل تۋرالى Stan.kz اقپارات اگەنتتىگى 31 ارنانىڭ “ينفورمبيۋرو” باعدارلاماسىنا سىلتەمە جاساپ حابارلايدى.

ازاماتتىڭ قارجىلىق جاعدايى جاقسارعانعا دەيىن بەرەشەگىن وتەۋ مەرزىمى شەگەرىلەدى. ەڭ باستىسى قارىز الۋشى تولەم قابىلەتىنەن ايىرىلعانىن دالەلدەي الۋى قاجەت.

نەسيەلىك دەمالىس بەرىلەتىن جاعدايلار ءارتۇرلى: جۇمىسسىز قالۋ, تابىستىڭ ازايۋى, دەكرەتتىك دەمالىس. كىرىسى كۇرت كەمىگەن نەمەسە قيىن جاعدايدا قالعان جاندار نەسيەسىن كەمىندە ءۇش ايعا شەگەرە الادى. بۇل مۇمكىندىكتى تابيعي اپاتتار مەن توتەنشە جايتتاردان زارداپ شەككەن تۇرعىندار دا پايدالانۋعا قۇقىلى. ول ءۇشىن بارلىق ءمان-جايدى ءتۇسىندىرىپ, ناقتى دالەلمەن قۇجاتتارىن ۇسىنسا بولعانى.

مامانداردىڭ ايتۋىنشا, يپوتەكالىق دەمالىستى ءبىر رەت ەمەس, ەكى رەت الۋعا بولادى. بىراق بۇل قارىزدان بوساتۋ ەمەس, تەك ۋاقىتشا جەڭىلدىك.

“تەك الەۋمەتتىك جاعدايلاردان ەمەس, جەكە قارجىلىق قيىندىق كورسەڭىز سول سەبەپتەن دە سىزگە دەمالىس بەرە الادى. تەك اۋىزشا ايتۋ جەتكىلىكسىز. سىزدە رەسمي قۇجاتتار بولۋى كەرەك. مىسالى جۇمىسىڭىزدان ايىرىلىپ قالعانىڭىزدى نەمەسە بالانىڭ تۋ تۋرالدى كۋالىگى, اسكەري قىزمەتكە بارعانىڭىزدى, ودان باسقا رەسمي قۇجاتتار كەرەك”, – دەيدى قارجىگەر راسۋل رامازان.

ساراپشى نەسيەلىك دەمالىس بەرۋ ءتارتىبى ءار قارجى ۇيىمىندا ءارتۇرلى ەكەنىن ايتادى. ونىڭ ايتۋىنشا, كوبىنە ءوتىنىش نەسيەنى 6 اي نە 1 جىل بويى كەشىكتىرمەي تولەگەن كەزدە عانا قابىلدانادى.

يپوتەكالىق دەمالىس قارىزدان قۇتىلۋدىڭ جولى ەمەس. ءتىپتى بورىشتىق جۇكتەمە ەسەلەپ ءوسۋى مۇمكىن, جەڭىلدىكتى قولدانباس بۇرىن, ويلانعان ءجون دەيدى ساراپشىلار.

ەسكە سالساق, بۇعان دەيىن قارجىلىق جاعدايى ناشارلاعان قازاقستاندىقتار اليمەنت تولەۋدەن بوساتىلاتىنى تۋرالى جازعان ەدىك.