Endi ıpotekasy bar qazaqstandyqtar nesıe tóleýdi ýaqytsha toqtata alady

Foto: istockphoto.com

Endi ıpotekasy bar qazaqstandyqtar qarjylaı qıyndyqtarǵa tap bolsa, qaryzyn tóleýdi ýaqytsha toqtata alady, dep jazdy qandastar.kz

Bul týraly Stan.kz aqparat agenttigi 31 arnanyń “Informbıýro” baǵdarlamasyna silteme jasap habarlaıdy.

Azamattyń qarjylyq jaǵdaıy jaqsarǵanǵa deıin bereshegin óteý merzimi shegeriledi. Eń bastysy qaryz alýshy tólem qabiletinen aıyrylǵanyn dáleldeı alýy qajet.

Nesıelik demalys beriletin jaǵdaılar ártúrli: jumyssyz qalý, tabystyń azaıýy, dekrettik demalys. Kirisi kúrt kemigen nemese qıyn jaǵdaıda qalǵan jandar nesıesin keminde úsh aıǵa shegere alady. Bul múmkindikti tabıǵı apattar men tótenshe jaıttardan zardap shekken turǵyndar da paıdalanýǵa quqyly. Ol úshin barlyq mán-jaıdy túsindirip, naqty dálelmen qujattaryn usynsa bolǵany.

Mamandardyń aıtýynsha, ıpotekalyq demalysty bir ret emes, eki ret alýǵa bolady. Biraq bul qaryzdan bosatý emes, tek ýaqytsha jeńildik.

“Tek áleýmettik jaǵdaılardan emes, jeke qarjylyq qıyndyq kórseńiz sol sebepten de sizge demalys bere alady. Tek aýyzsha aıtý jetkiliksiz. Sizde resmı qujattar bolýy kerek. Mysaly jumysyńyzdan aıyrylyp qalǵanyńyzdy nemese balanyń týý týraldy kýáligi, áskerı qyzmetke barǵanyńyzdy, odan basqa resmı qujattar kerek”, – deıdi qarjyger Rasýl Ramazan.

Sarapshy nesıelik demalys berý tártibi ár qarjy uıymynda ártúrli ekenin aıtady. Onyń aıtýynsha, kóbine ótinish nesıeni 6 aı ne 1 jyl boıy keshiktirmeı tólegen kezde ǵana qabyldanady.

Ipotekalyq demalys qaryzdan qutylýdyń joly emes. Tipti boryshtyq júkteme eselep ósýi múmkin, jeńildikti qoldanbas buryn, oılanǵan jón deıdi sarapshylar.

Eske salsaq, buǵan deıin qarjylyq jaǵdaıy nasharlaǵan qazaqstandyqtar alıment tóleýden bosatylatyny týraly jazǵan edik.