جاڭالىقتار
ەندى قازاقستاننىڭ كولىكتەرى قىتايدىڭ تەڭىز پورتتارىنا دەيىن بارا الادى
ەندى قازاقستاننىڭ جۇك كولىكتەرى قىتايدىڭ كەز كەلگەن قالاسىنا ەمىن-ەركىن كىرە الادى. ءماجىلىس بۇگىن ەكى ەل اراسىنداعى كولىك باعىتىن دامىتۋ جونىندەگى كەلىسىمدى ماقۇلدادى. بۇدان الىس-بەرىس ارتىپ, جۇك تاسىمالى 2-3 ەسەگە ۇلعايادى دەگەن بولجام بار. قىتاي بۇعان دەيىن بىردە-ءبىر مەملەكەتپەن مۇنداي كەلىسىمگە قول قويماعان.
ايا ءمۇتالى, ءتىلشى:قازاقستاندىق كولىكتەر بۇعان دەيىن قىتاي شەكاراسىنىڭ اينالاسىنداعى ايماقتارعا عانا باراتىن. ودان ارتىق وتە المايتىن. ەندى وتاندىق جۇك تاسىمالداۋشىلارى قىتايدىڭ كەز كەلگەن قالاسىندا كىرە الادى.
كاسىپكەرلەردىڭ پورتتان تاۋار الىپ, ەلىمىزگە قىسقا مەرزىمدە جەتكىزۋگە مۇمكىندىك بار. بيىلدىڭ وزىندە 200 مىڭ كولىككە وسىنداي رۇقسات بەرىلمەك.
مارات قاراباەۆ, قر كولىك ءمينيسترى:وسى ۋاقىتقا دەيىن قىتاي بىردە ءبىر ەلگە وسىلاي باسقا ەلدىڭ كولىكتەرىن ءوز ەلىنىڭ ىشىنە كىرۋگە مۇمكىندىك بەرمەگەن. بۇل العاش رەت قازاقستانعا جاسالىپ وتىرعان مۇمكىندىك. جانە ول بىلتىر مەملەكەت باسشىسىنىڭ سيان قالاسىنا جاسالعان ءىس-ساپارى شەڭبەرىندە قويىلعان كەلىسىم-شارتقا سايكەس ىسكە اسىرىلىپ وتىر.
كەلىسىمنىڭ تاعى ءبىر تيىمدىلىگى قاعازباستىلىق ازايادى. بۇدان بىلاي ەلەكتروندى قۇجاتپەن قاتىناۋعا مۇمكىندىك بەرىلمەك. ءارى كولىكتىڭ قايدا جانە قالاي جەتكىزىلگەنىن ونلاين باقىلاۋ قاراستىرىلعان. 30 كۇنگە دەيىنگى ۆيزاسىز رەجيم دە جۇك تاسىمالداۋشىلارىنىڭ جۇمىسىن جەڭىلدەتپەك. دەگەنمەن, كەدەن بەكەتىندە قاتاڭ تەكسەرۋدەن وتەدى.
مۇقاش ەسكەندىروۆ, قر پارلامەنتى ءماجىلىسىنىڭ دەپۋتاتى, «Amanat» فراكتسياسىنىڭ مۇشەسى:مىسالى, مەن جۇكتى قىتاي مەملەكەتىنە, شانحايعا الىپ باراتىن بولسام, مەن الدىن-الا بازاعا كىرەمىن. رۇقساتىن الامىن. شەكاراعا كەلگەندە ەكىجاقتى رۇقسات قاعازدارىم ۋجە ەلەكتروندى تۇردە بولادى.
اراداعى اۆتوكولىك لوگيستيكاسىن دامىتۋعا قازاقستان دا, قىتاي دا مۇددەلى. تاراپتار تاۋار اينالىمىن 40 ملرد دوللاردان 100 ملرد دوللارعا جەتكىزۋدى كوزدەيدى. بۇگىندە قازاقستاننان شيكىزات جانە اۋىل شارۋاشىلىق ونىمدەرى ەكسپورتتالسا, قىتايدان كوپتەگەن جابدىقتار مەن تاۋار تۇرلەرى كەلەدى. كەلىسىمدەگى تالاپتار ەكى جاققا دا بىردەي. سوندىقتان ساراپشىلار «قازاقستان نارىعىندا قىتايلىق جۇك كولىكتەرى قاپتاپ كەتەدى» پىكىردى جوققا شىعاردى. بىلتىر ەلىمىزدەن 120 مىڭنان استام جۇك كولىگى وتسە, قىتايدان نەبارى 6 مىڭعا جۋىق كولىك كىرگىزىلگەنىن ايتىپ وتىر.
