Endi jedel járdem kóligin onlaın kartadan baqylaýǵa bolady

Astanada jedel járdemniń qaı jerde kele jatqanyn endi naqty ýaqyt rejıminde baqylaýǵa bolady. Pılottyq joba týraly Densaýlyq saqtaý mınıstrligi málim etti. Bul týraly Qandastar.kz saıty KTK arnasyna silteme jasap habarlaıdy.

Arnaıy mobıldi qosymsha arqyly jedel járdemniń qaı jerde kele jatqanyn keıbir shaqyrtýlar sanaty boıynsha tek elorda turǵyndary baqylaı alady.

Endi jedel járdemniń birinshi kezektegi shuǵyl shaqyrtýlary boıynsha naýqastyń telefonyna SMS-habarlama keledi. Onda jedel járdem kóliginiń naqty ýaqyt rejıminde qozǵalysyn baqylaýǵa múmkindik beretin onlaın kartaǵa silteme bolady. Bul karta arqyly naýqas jedel járdemniń qaı jerde kele jatqanyn kóre alady.

Densaýlyq saqtaý mınıstrliginiń málimetinshe, «103» nómirine habarlasatyn azamattardyń jartysyna jýyǵy jedel járdemniń kelý ýaqytyn naqtylaıdy. Al jańa ınteraktıvti karta dıspetcherlik qyzmetke túsetin qaıtalama qońyraýlardy azaıtyp, dıspetcherlerge basqa shaqyrtýlardy qabyldaýǵa múmkindik beredi.

“Qazaqstan Respýblıkasy Densaýlyq saqtaý mınıstrligi Astana qalasynyń ákimdigi jáne Yandex Qazaqstan kompanııasymen birlesip, jedel medıınalyq kómek boıynsha pılottyq jobany iske qosty. Bolashaqta bul jobany ári qaraı damytýdy kózdep otyrmyz. Eger pılottyq jobanyń nátıjesi oń bolsa, ony shuǵyl qońyraýlardyń basqa sanattary jáne elimizdiń ózge qalalary men óńirlerine de keńeıtemiz”, – Densaýlyq saqtaý mınıstrliginiń Elektrondyq densaýlyq saqtaýdy damytý departamenti dırektorynyń mindetin atqarýshy Aıdar Qasenov.