Energetıkter energııa únemdeý úshin ýaqytty artqa jyljytýdy qoldady, biraq Qazaqstanda emes

Kórneki sýret

Brazılııanyń energetıka salasyndaǵy basshylar energııa únemdeý úshin jazǵy ýaqytqa aýysý máselesin qoldady, dep habarlaıdy qandastar.kz Ulysmedia.kz silteme jasap.

Endi jazǵy ýaqytqa aýysý kúshine enýi úshin ony prezıdent Lýıs Inasıý Lýla da Sılva qoldaýǵa tıis.

QURǴAQShYLYQ

Reuters málimetinshe, Eldegi qurǵaqshylyq Amazonka ózinenin tok óndiretin iri gıdroelektrostansalardyń jumysyna eleýli áser etip, el úlken kólemde energııa ımportaýǵa májbúr bolǵan.

Reuters málimetinshe, Latyn Amerıkasynda kún jáne jel energııasyn óndirý qarqyndy óskenimen, elektr qýatynyń jartysynan kóbi ózen men kól sýlarynan óndiriledi. Qurǵaqshylyq saldarynan sol ózen, kólderdegi sý mólsheri azaıyp, energııa óndirý kólemi qysqarǵan.

Qarasha men aqpan aralyǵynda ýaqytty bir saǵat alǵa jyljytý kúnniń jaryq mezgilin kóbirek paıdalanýǵa múmkindik berip, elektrenergııany qoldaný júktemesin azaıta túspek.

Jazǵy ýaqytqa aýysýdy eldiń burynǵy prezıdenti Jaır Bolsonarý energetıka salasyna paıdasy joq dep 2019 jyly toqtatyp tastaǵan.

MEIRAMHANALAR DA QOLDADY

Mundaı bastamany eldegi barlar men meıramhanalar da qoldaǵan. Olardyń esebinshe, kúndizgi artyq bir saǵat 18:00-20:00 aralyǵynda klıentterdiń kóbirek kelýine kómektesip, aılyq tabysty kemi 10% arttyrady.

ALAIDA

Áýe kompanııalary ýaqytty bir saǵatqa alǵa jyljytý reıs kestesin qıyndatyp, ekıpajdy qaıta bazalaýǵa qosymsha shyǵyn ákeletinin aıtyp otyr.

QAZAQSTANDA

Ýaqytty bir saǵatqa artqa jyljytý Qazaqstanda da qyzý talqylanyp jatyr. Ýaqyt 2024 jylǵy 1 naýryzda 1 saǵatqa alǵa aýystyrylǵaly eldiń shyǵysyndaǵy turǵyndar birqatar keleńsizdikterge tap bolǵan. Ol jaqta tań erte atyp, kesh erte túsedi. Sonyń saldarynan aýyldaǵy aǵaıyn tańǵy 3 jarymda sıyr saýyp, maldy óriske erte shyǵaratyn bolǵan. Qarańǵy erte túsetindikten elektrenergııa úshin kóbirek tólep, qarańǵyda sabaqtan qaıtatyn oqýshylarǵa alańdaıtynyn da jetkizgen. Qazaqstandyqtar osy máselege baılanysty onlaın petıııa jarııalap, oǵan qysqa ýaqytta 50 myń jınalǵan. Alaıda úkimet azamattardyń talap-tilegin eskerýsiz qaldyryp, ýaqyt jyljymaıtynyn málim etti. Dese de jýyrda májiliste bir top depýtat máselege qaıta oralyp, aldaǵy ýaqytta parlamentte osyny arnaıy kóteretinin málimdegen.