Er adam kóńildesin aıaýsyz óltirip, máıitin chemodanǵa salyp ketken

Sankt-Peterbýrgte er adam kóńildesin óltirgen. Qylmysty jasyrý úshin máıitti chemodanǵa salyp, jertólede kómip, zattaryn jınap, О́zbekstanǵa qashyp ketken, dep habarlaıdy Qandastar.kz aqparat portaly.

О́zbekstanda respýblıka azamatynyń ólimine qatysty atyshýly is boıynsha sot úkimi shyqty.

Áıeldiń denesi 2024 jyly Sankt-Peterbýrgtegi úıdiń jertólesinen tabylǵan.

Qylmysty onyń birge turatyn súıiktisi – Býhara oblysy Vabkent aýdanynyń týmasy jasaǵan.

Joǵarǵy sottyń málimetinshe, 25 jastaǵy er adam 2022 jyldan beri 32 jastaǵy, eki balanyń anasy bolǵan áıelmen qarym-qatynasta bolǵan. Keıin ol Reseıge jumys isteýge ketip, Sankt-Peterbýrgtiń Nevskıı aýdanynda sol áıelmen birge turǵan. Alaıda birneshe apta birge turǵan soń olardyń arasynda janjaldar bastalǵan. Er adamnyń aıtýynsha, janjaldardyń sebebi — áıeldiń qyzǵanyshtan daý shyǵaryp, О́zbekstandaǵy áıelimen ajyrasýyn talap etýi bolǵan.

«Kezekti janjal kezinde ol áıeldi uryp-soǵyp, jastyqpen tunshyqtyryp óltirgen. Qylmysty jasyrý úshin denesin chemodanǵa salyp, kórshi úıdiń jertólesine kómip tastaǵan», – delingen sot materıaldarynda.

Ol áıeldiń týystaryna onyń atynan habarlama jiberip, basqa qalaǵa ketip qalǵanyn, biraz ýaqyt baılanysqa shyqpaıtynyn aıtqan. Budan soń er adam shuǵyl túrde bılet alyp, О́zbekstanǵa ushyp ketken, jolda onyń telefonyn tastaǵan.

On kúnnen keıin profılaktıka ınspektory ony shaqyryp, jaýap alý barysynda ol jasaǵan qylmysyn moıyndaǵan. Reseılik quqyq qorǵaý organdarymen birlesip júrgizilgen tergeý barysynda onyń kinási tolyq dáleldendi. Sondaı-aq er adamnyń áıeldiń atyna 50 mıllıon sýmǵa nesıe rásimdep, aqshany óz qajetine jumsaǵany anyqtaldy.

Sot ony О́zbekstan Respýblıkasy Qylmystyq kodeksiniń 97-baby (Kisi óltirý) boıynsha kináli dep tanyp, jalpy rejımdegi kolonııada 11 jyl bas bostandyǵynan aıyrý jazasyna kesti.