«ەر ادامعا ءيىلىپ امانداسۋ كەرەك»: الماتىداعى اباي ۋنيۆەرسيتەتىنىڭ قىزدارعا وتكىزگەن جيىنى كوپتىڭ اشۋىن تۋعىزدى

فوتو: Qumash Telegram-ارناسى

الماتىداعى اباي اتىنداعى قازاق ۇلتتىق پەداگوگيكالىق ۋنيۆەرسيتەتى ستۋدەنت قىزدارعا ەر ادامنىڭ الدىندا ءوزىن ۇستاۋ, كيىنۋ جانە سويلەۋ تۋرالى جيىن وتكىزگەن, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

اباي اتىنداعى قازاق ۇلتتىق پەداگوگيكالىق ۋنيۆەرسيتەتى ستۋدەنت قىزداردى جيناپ, وزدەرىن قالاي ۇستاۋ كەرەگى تۋرالى ناسيحات جاساعان. مۇنى ستۋدەنت قىز Qumash Telegram-ارناسىنا مالىمدەگەن.

“ۋنيۆەرسيتەت اكىمشىلىگى ءبىرىنشى كۋرستىڭ بارلىق قىزىن ياعني 40-50 ادامدى جيناپ, قىز بالاسى يناباتتى, يبالى بولۋ كەرەك دەگەن پلاكاتتاردى ىلگەن. سودان كەيىن ءارتۇرلى جاستاعى ەر ادامدار قىزداردىڭ مىنەز-قۇلقى تۋرالى ايتقان ۆيدەوروليكتەرىن قوسقان”, – دەلىنگەن ارنادا.

ستۋدەنتتىڭ ايتۋىنشا, ۆيدەونىڭ نەگىزگى تەزيسى قىزدار اشىق-شاشىق كيىنبەۋ كەرەگىن, قاتتى داۋىس شىعارىپ سويلەمەۋى ءتيىس ەكەنىن, ەر ادامداردى كورگەندە, ءيىلىپ سالەمدەسۋ كەرەگىن تۇسىندىرەدى. سونداي-اق ۇزىن بەلدەمشە كيۋ ادەپتىلىك بەلگىسى دەپ ايتقان.

سونىمەن قاتار اعا وقىتۋشى ەۋروپالىق ايەلدەرگە ەلىكتەۋگە بولمايتىنىن ايتقان. ولاردىڭ شامادان تىس ەركىندىگىنەن لگبت جانە باسقا دا نارسەلەر كەڭ تارالعانىن ايتتى. ولاردى جيىننان شىعارماي قويىپتى.

بۇل جيىن جەلى قولدانۋشىلارىنىڭ نارازىلىعىن تۋدىردى.

“جىگىتتەردىڭ قانداي بولۋ كەرەگى تۋرالى دا جيىن وتكىزىڭىزدەرشى”, “ايەلدەردى جايىنا قالدىرىڭىزدار. ءبىزدى تاربيەلەپ, اقىل ايتۋدى دوعارىڭىزدار. قىزدار ءوز ومىرىنە ءوزى جاۋاپكەرشىلىك الا الادى. ەرلەرگە ءوزىن-ءوزى ۇستاۋدى ۇيرەتىڭىزدەر”, “ەرلەرگە قول كوتەرمەۋ, ۇرماۋ, زورلاماۋ جانە بالالارىن تاستاماۋ تۋرالى اقىل ايتقان دۇرىسىراق” دەپ جازدى جەلىدەگىلەر.

Stan.kz ءتىلشىسى جاعدايعا قاتىستى ۋنيۆەرسيتەتتەن پىكىر سۇرادى. ءباسپاسوز حاتشىسى بۇل جيىن ۇلتتىق قۇندىلىقتى دارىپتەۋ ماقساتىندا وتكەنىن ايتادى. سوزدەرىنشە, مۇنداي جيىندار ولاردا تۇراقتى تۇردە وتەدى.

“5 مامىردا ۋنيۆەرسيتەت قابىرعاسىندا ستۋدەنتتەرگە ارنالعان جالپى تاربيەلىك باعىتتاعى كەزدەسۋلەردىڭ ءبىرى ءوتتى. وسى ۋاقىتقا دەيىن ولارعا قاتىستى قانداي دا ءبىر سىن بولعان ەمەس.

اتالمىش ءىس-شارانىڭ دا نەگىزگى ماقساتى – ۇلتتىق قۇندىلىقتاردى دارىپتەۋ, جاستاردىڭ مادەني-ادەپتىلىك سانا-سەزىمىن ارتتىرۋ جانە ەتيكالىق نورمالاردى ءتۇسىندىرۋ.

كەزدەسۋ بارىسىندا كورسەتىلگەن ۆيدەو كەيبىر قاتىسۋشىلارعا باسقاشا اسەر ەتىپ, ولاردىڭ اراسىندا بىرجاقتى پىكىر تۋعىزعان. ۋنيۆەرسيتەت اكىمشىلىگى بۇل جاعدايعا تۇسىنىستىكپەن قاراپ, الداعى ۋاقىتتا مۇنداي مازمۇنداعى ماتەريالداردى تاڭداۋدا بارىنشا مۇقيات بولادى. اباي ۋنيۆەرسيتەتى – زايىرلى ءبىلىم بەرۋ مەكەمەسى. ءبىز ستۋدەنتتەردىڭ جەكە تاڭداۋىنا, ەركىندىگىنە جانە پىكىر الۋاندىعىنا قۇرمەتپەن قارايمىز”, – دەلىنگەن حابارلامادا.

ۋنيۆەرسيتەت ۇجىمى ستۋدەنتتەرمەن اشىق ديالوگقا ءاردايىم دايىن ەكەنىن جانە ولاردىڭ پىكىرىن ەسكەرۋگە مۇددەلى ەكەنىن اتاپ ءوتتى.