جاڭالىقتار
ەربايان مۇحتاردى قاراعان دارىگەرلەردىڭ ۇستىنەن قىلمىستىق ءىس قوزعالدى
فوتو: sn.kz
اسكەري قىزمەتكەر ەربايان مۇحتاردىڭ ءىسى بويىنشا تاعى ءبىر قىلمىستىق ءىس قوزعالدى, دەپ حابارلايدى qandastar.kz Skifnews.kz اقپارات پورتالى.
«ەربايان مۇحتاردىڭ ءىسى بويىنشا تاعى ءبىر قىلمىستىق ءىس قوزعالدى. بۇگىن بەلگىلى بولعانداي, 1 قازان كۇنى نەگىزگى قىلمىستىق ىستەن بولەك, دارىگەرلەردىڭ ارەكەتىنە قاتىستى قىلمىستىق ءىس تىركەلىپ, تەرگەۋ باستالدى. بۇل ءىس بويىنشا دا ساراپتاما تاعايىندالدى. ءبىز دە نەگىزگى ءىس بويىنشا ساراپتامانىڭ قورىتىندىسىن كۇتىپ وتىرمىز. سىزدەردىڭ قولداۋلارىڭىزبەن ادىلدىكتى تالاپ ەتە بەرەمىز», — دەپ جازدى يمانباي الەۋمەتتىك جەلىدەگى پاراقشاسىندا.
ايتا كەتەيىك, ەربايان مۇحتار ۇلتتىق ۇلاننىڭ الماتى قالاسىنداعى 5571 اسكەري بولىمىندە اسكەري بورىشىن وتەپ جۇرگەن. 2023 جىلدىڭ جەلتوقسانىندا سارباز مي جاراقاتىن الىپ, سودان كەيىن كوماعا تۇسكەن. اسكەريلەر تۋىستارىنا ەرباياننىڭ دارەتحانادا قۇلاپ, باسىن ەدەنگە سوعىپ العانىن ايتقان. الايدا ساربازدىڭ جاقىندارى ۇلدارىنىڭ ابايسىزدا قۇلاپ قالعانىنا سەنبەيدى. ىشكى ىستەر مينيسترلىگى تەرگەۋ بارىسىن ءوز باقىلاۋىنا الدى.
