ەرجان سادەنوۆ «اۋىل» پارتياسىنىڭ بەتىن قايتارىپ تاستادى

فوتو: اشكەرە تەلەگرام ارناسى

ىشكى ىستەر ءمينيسترى ەرجان سادەنوۆ «اۋىل» پارتياسىنىڭ بەتىن قايتارىپ تاستادى. بۇعان دەيىن پارتيا دەپۋتاتتارى ء«ىشىپ الىپ رولگە وتىراتىندارعا كەڭشىلىك جاسايىق» دەگەن-ءتىن.

مينيستر ماس كۇيدە كولىك جۇرگىزگەندەردى كەشىرۋ نەمەسە جازاسىن جەڭىلدەتۋ قوعامعا جاسالعان قيانات دەپ وتىر, دەپ جازدى qandastar.kz

«كولىكتى ىشىمدىك ءىشىپ باسقارعاندارعا قاتىستى قازىرگى جازا ءادىل ءارى زاڭدى قۇرمەتتەۋگە تاربيەلەيتىن شارا. جەڭىلدىك جاساۋعا نەگىز جوق», – دەيدى مينيستر.

اشكەرە تەلەگرام ارناسى حابارلاعانداي,
كەزىندە ماس كۇيىندە كولىك باسقارعاندار 1 جىلعا دەيىن «پراۆودان» ايىرىلاتىن. سوڭعى وزگەرىستەردەن كەيىن بۇل مەرزىم 7 جىلعا دەيىن ۇلعايتىلعان ەدى.

سونىڭ ارقاسىندا كەيىنگى كەزدە ماس كۇيدە كولىك جۇرگىزگەندەر سانى 14 پايىزعا ازايىپتى. 2019 جىلى 28 مىڭ وقيعا بولسا, بيىل بۇل كورسەتكىش 🚓 24 مىڭعا دەيىن تومەندەگەن.

«زاڭداعى جازانىڭ قاتاڭدىعى قوعامدى تارتىپكە شاقىرىپ, اپاتتىڭ الدىن الۋعا سەپ بولىپ وتىر», – دەيدى مينيستر.

ايتۋىنشا, دامىعان ەلدەردە كولىكتى ءىشىپ ايدايتىندارعا اياۋشىلىق تانىتپايدى. جاپونيادا ماس جۇرگىزۋشىنىڭ ءوزىن عانا ەمەس, كولىككە بىرگە وتىرعان جولاۋشىلاردى دا جازاعا تارتادى. مالايزيادا ءتىپتى جۇرگىزۋشىنىڭ جۇبايىن دا قاماپ تاستاۋى مۇمكىن. قىتايدا اجالعا سەبەپ بولعان جۇرگىزۋشىگە ءولىم جازاسى قولدانىلادى. بەلارۋستە تاپ سول ارادا كولىكتى تاركىلەپ, مەملەكەتتىڭ بالانسىنا وتكىزەدى ەكەن.

وسىلايشا كولىكتى ءىشىپ ايداعانى ءۇشىن «پراۆاسىنان» ايىرىلعان قاۋىمنىڭ ءۇمىتى ءۇزىلدى. «ماشنەگە وتىرماي تۇرىپ, ويلانۋ كەرەك ەدى» دەيدى مينيستر سادەنوۆ.