«Eshqandaı oıyn emes, dalbasa áńgime»: Bıbigúl Dáýletbekqyzy sýııd jasaǵan mektep oqýshylaryna qatysty oıyn bólisti

Foto: jeke qorynan

Tanymal jýrnalıst Bıbigúl Dáýletbekqyzy kópqabatty úıdiń shatyrynan sekirip ketken mektep oqýshylarynyń oqıǵasyna qatysty pikir bildirdi. Bul týraly qandastar.kz   Stan.kz aqparat agenttigine silteme jasap habarlaıdy.

AQ ókili qandy oqıǵaǵa jaýapsyz bolǵan ata-analardy kinálady.

“Almatyda taǵy da 12 jasar qyz kóp qabatty úıden sekirip qaıtys boldy. Bir aptanyń ishinde úsh qyzdyń sekirip ólýi — tragedııa. Bul balalardy ólimge ıtermelep jatqan eshqandaı da oıyn emes! Dalbasa áńgime! Nemquraılylyq! Iá, ózderińiz jibergen qatelikter. Mekteptegi býllıń, esirtki zattar jáne lýdomanııa. Osylaı kete beredi”, — dep jazdy jýrnalıst.

Jýrnalıstiń sózinshe, balalardy betimen jibergen jumysbasty ata-ananyń kóbeıýinen osyndaı oqys oqıǵalar jıilep ketken.

“Sebebin tereńnen qazyńyzdar! Balalaryńyz sizder jumysbasty bolyp júrgende dalada nebir sumdyq qylyqtardy jasap júrgenin umytpańyzdar! Analar, sýııd jasaǵan balanyń ólimine basqany kinálamańyzdar! Olardyń jaýy – esirtki men lýdomanııa. Myqty bolsańdar, osy jylannyń basyn shabyńdar! Balań aqsha suraı berse, osy ekeýiniń birimen aýyrady dep oılańdar!”, – dedi qoǵam belsendisi.

Eske salaıyq, buǵan deıin Almatyda eki oqýshy qyz toǵyzynshy qabattan qulap mert boldy. Keıin oqýshy qyzdardyń jaqyndary olardy buǵan ne ıtermelegenin aıtqan edi. Sonymen qatar olar mektepterde telefonǵa tyıym salýdy usyndy.