«Eshkim sengen joq»: Sabına Altynbekova jan syryn aqtardy

Qazaqstandyq voleıbolshy Sabına Altynbekova áleýmettik jelidegi paraqshasynda kásibı sporttaǵy qıyn da, qyzyqty joly týraly oıyn bólisti, dep jazady Qandastar.kz 1bol.kz-ke silteme jasap.

«Bir kezderi kip-kishkentaı ǵana Sabına sportzalǵa jaıaý baratyn, sebebi avtobýs janynan toqtamaı óte shyǵatyn.

Árdaıym jattyǵýǵa erte kelip, sońynan ketetinmin. Maǵan talaı ret: «Bul seniń qolyńnan kelmeıdi, qarashy, dobyń tipti torǵa da jetpeıdi» deıtin. Biraq men tynymsyz eńbektenip, sońyna deıin kúressem, maqsatyma jetetinimdi bildim.

Jolymda túrli adamdar kezdesti: arasynda peıili nashary da, qyzǵanyshqa toly kózqaras ta boldy. Jaratqan meniń adaldyǵym men eńbekqorlyǵymdy kórip, bir kúni maǵan erekshe múmkindik syılady. Sol sátten bastap qyzǵanysh ta, qysym da arta tústi. Sol sekildi qoldaýshylarym da kóbeıdi. Biri meniń qadirim men eńbegimdi barynsha joqqa shyǵarýǵa tyryssa, endi biri aqylǵa salyp: «Eshteńe jaıdan-jaı bolmaıtynyn» túsindi.

Maǵan eshqashan aqsha da, ataq ta, marapat ta mańyzdy bolǵan emes. Bar bolǵany súıgen isimmen aınalysýdy toqtatqan emespin. Maǵan eshkim sengen joq, biraq óz-ózime degen senim meni alǵa jeteledi. Qalǵan dúnıeler meni alańdatqan emes.

Nátıjesinde sheteldik klýbtardan tıimdi kelisimsharttar aldym. Keı komandalarda kapıtandyq qyzmet te atqardym. Ádette sport áleminde shetelden kelgen sportshyǵa kapıtandyqty senip tapsyra bermeıdi. Biraq ómirde múmkin emestiń ózi múmkin. Bireýler muny tek «sáttilik» dep oılaıtyn shyǵar, meıli, biraq men úshin óz jolymnan taımaý mańyzdy. О́ıtkeni rýhy myqty adam eshqashan qıyndyq pen synaqtan qoryqpaıdy», — dep jazdy Altynbekova.

Aıta keteıik, byltyrǵy qazan aıynda otandyq sportshy Indonezııanyń «Ioga Felkons» klýbymen kelisimshartqa qol qoıǵan bolatyn. Bıyl atalǵan komanda eliniń Pro-lıgasynda alǵash ret baq synaıdy. Altynbekova qazir óz klýbynyń kapıtany.