فەرمەرلەر تۇقىمنىڭ ارزانىنا قىزىعىپ, ساپاسىز ءداندى داقىلعا ۇرىنۋى مۇمكىن – پاۆلودارلىق عالىم

يمپورت تۇقىمنىڭ ونگىشتىك قاسيەتى كەمىپ كەتكەنىنە عالىمداردىڭ ءوزى قايران قالىپ وتىر. ءتىپتى, كەيبىر داقىلدار بويىنشا بۇل كورسەتكىش 40-60 پايىزدان اسپايدى.

بيىل پاۆلودار وبلىسىندا تۇقىم تاپشىلىعى بار.

وڭىرلىك اۋىل شارۋاشىلىعى باسقارماسى باسشىسىنىڭ مىندەتىن اتقارۋشى تولەگەن كوشەرباەۆتىڭ ايتۋىنشا, كوكتەمگى دالا جۇمىستارى ءۇشىن 174,4 مىڭ توننا تۇقىم قاجەت. وبلىس بويىنشا تۇقىمنىڭ جالپى جەتىسپەۋشىلىگى — 21 مىڭ توننا. بۇل كولەم وڭىردەن تابىلماسا, وزگە ايماقتاردان, شەت مەملەكەتتەردەن ساتىپ الىنادى.

الايدا, ديقاندار تۇقىم ساتىپ الۋدا ارزانىنا ۇمتىلىپ, ساپاسىز ءداندى داقىلعا ۇرىنۋى مۇمكىن.

«پاۆلودار اۋىل شارۋاشىلىعى تاجىريبەلىك ستانساسى» جشس-نىڭ اعا عىلىمي قىزمەتكەرى ناتاليا جۋكوۆانىڭ ايتۋىنشا, فەرمەرلەر كەز كەلگەن تۇقىمنىڭ نەگىزگى ەكى ساپا كورسەتكىشىنە كوڭىل اۋدارۋى كەرەك.

ەڭ اۋەلى سىرتتان ساتىپ الىناتىن تۇقىمنىڭ فيتوسانيتاريالىق تالاپتارعا ساي بولۋى ناقتىلاۋى كەرەك. اۋدانداستىرىلماعان ءداندى داقىلمەن ءبىزدىڭ وسىمدىكتەر ءۇشىن قاۋىپتى اۋرۋلاردىڭ قوزدىرعىشتارى كەلۋى مۇمكىن. كەيبىر قاۋىپتى اۋرۋ تۇرلەرى ۇلكەن ەگىس تاناپتارىن تىپ-تيپىل ەتىپ جىبەرۋگە قابىلەتتى.

ەكىنشىدەن, كەز كەلگەن تۇقىمنىڭ ونگىشتىك كورسەتكىشىن ابدەن زەردەلەۋ كەرەك. كوكتەمگى ەگىس جۇمىستارىنا دەيىن ءالى ۋاقىت بار. كەيبىر فيرمالار تاۋارلىق داقىلدى تۇقىم دەپ ساتىپ جىبەرۋى ابدەن مۇمكىن. سوندىقتان عالىمداردىڭ, زەرتتەۋ ينستيتۋتتارى مەن زەرتحانالاردىڭ كومەگى ارقىلى داقىلداردىڭ بۇل قاسيەتىن انىقتاۋعا بولادى. ماسەلەن بىلتىر سولتۇستىك قازاقستان, قاراعاندى, قوستاناي وبلىستارىندا كۇزگى جاڭبىردان استىقتىڭ ساپاسى تومەندەپ كەتتى. ديقاندار سۋ استىقتى جيناپ, ونى قولدان كەپتىرۋگە ءماجبۇر بولدى. بۇل ءداندى داقىلداردىڭ ساپاسىن ايتارلىقتاي كەمىتتى. جۋىقتا ءبىز وزگە ءبىر ايماقتان اكەلىنگەن تۇقىمنىڭ ساپاسىن تەكسەرىپ كوردىك. ونىڭ ونگىشتىك قابىلەتى 40-60 پايىز ارالىعىندا عانا ەكەنى بەلگىلى بولدى. تۇسىنىكتىرەك بولۋى ءۇشىن ايتايىن, ءبىزدىڭ تاجىريبەلىك ستانسادا تۇقىم ءوندىرۋ كەزىندە بەلگىلى ءبىر داقىلدىڭ 100-دەن 97 پايىزى عانا ءونىپ شىقسا, ول تۇقىم ءتۇرى سىرتقا شىعارىلمايدى. ياعني تولىققاندى ءونىم بەرۋگە قابىلەتسىز دەگەن ءسوز. 40-60 پايىز — ەگىلەتىن ەگىننىڭ تەڭ جارتىسىنان ءونىم الىنبايدى دەگەنگە سايادى. ياعني, فەرمەر 100 گەكتارعا ەگىن سالسا, ونىڭ 60 گەكتارىندا تۇك شىقپايدى. بۇل – ەرتەڭگى كۇنى قىپ-قىزىل شىعىن, — دەيدى ن.جۋكوۆا.
ماماننىڭ سوزىنشە, پاۆلودار وبلىسى بويىنشا ەرتىس, جەلەزين, ۋسپەن اۋداندارىندا بيىل ىلعالدىڭ مول قورى بايقالادى. ال شارباقتى, اققۋلى, پاۆلودار اۋداندارىندا كەرىسىنشە قار از تۇسكەن. سوندىقتان بىلتىرعى قۇرعاقشىلىق كەيبىر جەرلەردە قايتالانۋى ابدەن مۇمكىن.

«ەگەر الداعى ۋاقىتتا اۋا رايىن بولجاۋشىلار بيىلعى جازدىڭ دا قۇرعاق وتەتىنىن بولجاسا, وندا شارۋالارعا بىرتىندەپ بيداي مەن ارپادان گورى تامىرى تەرەڭگە كەتەتىن داقىل تۇرلەرىن تاڭداعانى دۇرىس. مىسالى كۇنباعىستىڭ تۇقىمى تامىرىن تەرەڭگە سالادى. ءبىزدىڭ ستانسا بۇل جاعىنان شارۋالارعا اقىل-كەڭەس بەرە الادى. كەيىنگى جىلدارى الەم بويىنشا كليمات وتە قۇبىلمالى, سوعان وراي الداعى جازدىڭ قالاي وتەتىتىن تاپ باسىپ ايتۋ قيىن. كوكتەمگى تۇقىم سەبۋ شارالارىن قاي مەزگىلدە جۇرگىزۋ كەرەكتىگى تۋرالى دا ەرتە باستان ايتۋ ويعا سىيمايدى», — دەدى مامان.
«پاۆلودار اۋىل شارۋاشىلىعى تاجىريبەلىك ستانساسى» بيىل شارۋالارعا تۇقىم ساتا المايتىنى دا بەلگىلى بولىپ وتىر. سەبەبى بىلتىر 1400 گەكتار جەرگە ەگىن سالىپ, ول تولىعىمەن قۇرعاقشىلىق سالدارىنان كۇيىپ كەتكەن. تۇراقتاندىرۋ قورىنىڭ ارقاسىندا بيىل نەبارى 1000 گەكتارعا تۇقىم سەبىلەدى دەپ جوسپارلانىپ وتىر.