فەرروقورىتپا زاۋىتى: نىعماتۋللينگە تيەسىلى كورپوراتسيا سوتتا كىناسىن مويىندامادى

فوتو اشىق دەرەككوز

سوتتا كورپوراتسيا وكىلى تاعىلعان اكىمشىلىك قۇقىق بۇزۋشىلىق بويىنشا كىناسىن مويىندامادى. بىراق وعان قارسى بۇلتارتپاس دالەلدەر ۇسىنىلدى. وسىلايشا «YDD Corporation» جشس فەرروقورىتپا زاۋىتىنا توتەنشە جاعداي كەزىندە قۇتقارۋشىلاردى ىشكە كىرگىزبەگەنى ءۇشىن 738 مىڭ تەڭگە كولەمىندە ايىپپۇل سالىندى, دەپ حابارلايدى qandastar.kz.

قاراعاندى وبلىسىندا قاراعاندى توتەنشە جاعدايلار باسقارماسى كوتەرگەن سوت پروتسەسى اياقتالدى. فەرروقورىتپا زاۋىتىنىڭ اكىمشىلىگى قىزمەتتىك مىندەتتەرىن ورىنداپ جۇرگەن تۇلعالارعا كەدەرگى كەلتىرگەنى ءۇشىن جانە قۇجاتتار مەن ماتەريالداردى ۇسىنۋدان باس تارتقانى ءۇشىن ايىپتالدى.

زاۋىت وكىلدەرى ايىپتاردى نەگىزسىز دەپ ساناپ, توتەنشە جاعداي تۋرالى ەڭبەك ينسپەكتسياسى مەن پوليتسياعا حابار بەرگەندەرىن مالىمدەدى.

«200 ايلىق ەسەپتىك كورسەتكىش مولشەرىندە اكىمشىلىك ايىپپۇل تۇرىندەگى جازا تاعايىندالدى», دەپ حابارلادى قاراعاندى قالاسىنىڭ اكىمشىلىك قۇقىقبۇزۋشىلىقتار جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى.

سوت قاۋلىسى زاڭدى كۇشىنە ەنگەن جوق.

ەسكە سالايىق, شىلدەدە YDD كورپوراتسياسىنىڭ فەرروقورىتپا زاۋىتىندا پەشتەن كەنەتتەن شىققان ورتتەن 8 جۇمىسشى زارداپ شەگىپ,ءتۇرلى دارەجەدە كۇيىك الدى. ولاردىڭ 4-ەۋى كەيىن العان جاراقاتتارىنان قايتىس بولدى.