جاڭالىقتار
Fly Arystan بيلەتتەرى نەگە قىمباتتادى – مينيستر جاۋاپ بەردى
فوتو: Pixabay.com
كولىك ءمينيسترى مارات قاراباەۆ ەلدەگى لوۋكوستەر اۋە كومپانياسىنىڭ بيلەتتەرى نەگە وزگە كومپانيالاردان قىمبات ەكەنىن ءتۇسىندىردى, دەپ حابارلايدى Skifnews.kz اقپارات پورتالى.
«لوۋكوسەر ءوز ماقساتىنان اينىعان جوق. كەزىندە 12-16 مىڭ تەڭگەدەن بيلەتتەر شىققاندا, مۇلدەم ۇشاقپەن ۇشپاعان ادامدار دا ۇشىپ باستادى. بۇل قازاقستاندىقتار اراسىندا جاڭا مادەنيەت قالىپتاستىردى. سونىڭ ناتيجەسىندە سوڭعى ءۇش جىلدا اۋەجاي جولاۋشىلارى سانى 20 پايىزعا ارتتى. جالپى Fly Arystan قۇرىلعالى بيلەتتەرىنىڭ 56 پايىزى جەڭىلتەتىلگەن باعامەن ساتىلعان», – دەپ جاۋاپ بەردى مينيستر ۇكىمەت ۇيىندە ءتىلشى سۇراعىنا.
مينيستر بيلەت باعاسى مەملەكەت تاراپىنان قاداعالانبايتىنىن, بۇل نارىقتىق ەكونوميكا ەكەنىن دە ەسكە سالدى.
ال ءتىلشى لوۋكوستەر باعاسىنان Air Astana, Scat اۋە كومپانيالارىنىڭ بيلەتى ارزانىراق شىعاتىنىن ايتتى.
«قازىر الماتىدان استاناعا 19 قىركۇيەككە بيلەت قاراپ وتىرىمىن, 19 مىڭ تەڭگەدەن بيلەتتەر بار. جالپى بيلەت باعاسىنىڭ 60 پايىزىن جانار-جاعارماي قۇرايدى, وعان قوسا ۇشاقتى كۇتىپ-ۇستاۋ, قوزعالتقىش سەكىلدى بولشەكتەرىنىڭ باعاسى شەتەلدىك ۆاليۋتادا ءوسىپ جاتىر, بۇل دا باعاعا اسەر ەتەدى. سكاتتىڭ ءوزى دە جەڭىلدىكتى بيلەت جۇيەسىن ەنگىزىپ جاتىر. بۇل ارينە جاقسى, Fly Arystan بوملاعاندا بيلەت باعاسى قىمباتقا ساتىلار ەدى», – دەيدى م. قاراباەۆ.
سونىمەن بىرگە, مينيستر قازاقستاندىق جانە شەتەلدىك اۋە كومپانيالارىن سالىستىرۋعا بولمايتىنىن ايتتى.
«بىرىنشىدەن حالىقارالىق باعىتتاردا قانشا كومپانيانىڭ جۇمىس ىستەيتىنىنە قاراۋ كەرەك. ءبىر باعىتقا بىرنەشە كومپانيا ۇشسا, قىزۋ باسەكەلەستىك باعاعا اسەر ەتەدى. ەكىنشىسى, ارا قاشىقتىق شاقىرىمىن ەسەپتەۋ كەرەك. تۋرا سول شاقىرىمدى ەسەپتەسەڭىز, ەۋروپاداعى باعا بىزدىكىمەن بىردەي نەمەسە بىزدىكى تومەن بولىپ شىعادى. مۇنداي ەگجەي-تەگجەيلى سارالاۋدى ءجيى وتكىزەمىز. جالپى ۇشاقتى كۇتىپ-ۇستاۋدا الەم بويىنشا ءبىر باعا بار. وسىنىڭ ءبارى بيلەت قۇنىنا اسەر ەتەدى», – دەيدى كولىك ءمينيسترى.
