فوتوعا تۇسەمىن دەپ وزەنگە باتىپ كەتكەن: تۇركىستان وبلىسىندا 16 جاستاعى قىز ىزدەستىرىلىپ جاتىر

فوتو: تۇركىستان وبلىسى تجد

تۇركىستان وبلىسى توتەنشە جاعدايلار دەپارتامەنتى قۇتقارۋشىلارى 16 جاستاعى قىزدى ىزدەپ جاتىر, – دەپ حابارلايدى Massaget.kz تىلشىسى.

دەپارتامەنت مالىمەتىنشە, 28 شىلدەدە ساعات 10:41-دە تۇركىستان وبلىسى تجد كەزەكشى پۋلتىنە «سايرام-وگەم» اۋماعىنا قاسقاسۋ اۋىلىنان 15 شاقىرىم قاشىقتا, سايرام-سۋ تاۋلى وزەنىندە ساعات 10:00-دە قىز سۋعا باتىپ كەتكەنى تۋرالى اقپارات تۇسكەن. دوستارىنىڭ ايتۋىنشا, ول فوتوسەسسيا جاساۋ كەزىندە ابايسىزدا وزەنگە قۇلاعان.

ىزدەستىرۋ قۇتقارۋ جۇمىستارىنا تۇركىستان وبلىسى تجد 37 قىزمەتكەرى, 1 ءجۇزۋ قۇرالى جانە 4 تەحنيكاسى, تۇركىستان وبلىسى پد 6 قىزمەتكەرى جانە 3 تەحنيكاسى, جەرگىلىكتى اتقارۋشى ورگانداردان 11 قىزمەتكەر جۇمىلدىرىلدى.

«تۇركىستان وبلىسىنىڭ تجد ازاماتتاردى سۋداعى قاۋىپسىزدىك ەرەجەلەرىن ساقتاۋعا شاقىرادى», – دەپ جازىلعان حابارلامادا.