جاڭالىقتار
گولوۆكين جاڭا قىزمەتكە كەلدى
فوتو: نوك رك
ازيا وليمپيادالىق كەڭەسى (اوك) ۇيىم كوميتەتتەرىنە ەنگەن جاڭا مۇشەلەرىن تانىستىردى. ۇيىمنىڭ سپورت كوميتەتىنە گەننادي گولوۆكين تاعايىندالدى, دەپ حابارلايدى qandastar.kz
ۇوك مالىمەتىنشە, تاعايىنداۋ تۋرالى شەشىمدى ازيا وليمپيادالىق كەڭەسىنىڭ پرەزيدەنتى رادجا راندحير سينگح ۇندىستاننىڭ نيۋ-دەلي قالاسىندا وتكەن اوك-تىڭ 44-ءشى باس اسسامبلەياسىندا قابىلدادى.
اوك كوميتەتتەرىنىڭ قۇرامىنا قازاقستان ۇلتتىق وليمپيادا كوميتەتىنىڭ (ۇوك) باسشىلارى مەن قىزمەتكەرلەرى ەندى. سپورت كوميتەتىنە قازاقستاننىڭ ۇوك پرەزيدەنتى گەننادي گولوۆكين تاعايىندالدى.
باس حاتشى الىمجان اقاەۆ حالىقارالىق قاتىناستار كوميتەتىنىڭ مۇشەسى بولدى. PR جانە ماركەتينگ دەپارتامەنتىنىڭ ديرەكتورى گۇلناز شۇكەنوۆا مەديا جانە باق كوميتەتىنە كىردى, ال cپورت دەپارتامەنتىنىڭ باس مەنەدجەرى رومان تەمىرجانوۆ اقپارات جانە ستاتيستيكا كوميتەتىنە قوسىلدى. سونىمەن قاتار ورتالىق ازيانىڭ ايماقتىق انتيدوپينگ ۇيىمىنىڭ (RADOCA) ديرەكتورى ۆەنەرا ابدۋللا انتيدوپينگ كوميسسياسىنىڭ مۇشەسى اتاندى.
سونىمەن, بۇل جاڭارتىلعان اوك كوميتەتتەرى 2028 جىلعا دەيىن قىزمەت اتقاراتىن بولادى.
