گۋمانيتارلىق كومەك: قازاقستان قاي ەلگە كومەكتەستى جانە قاي ەلدەن كومەك الدى

ەلىمىزدە بيىلدان باستاپ ناۋرىز 10 كۇن بويى تويلانادى. ۇلىق مەرەكەنىڭ جاڭا فورماتى بويىنشا 14-23 ناۋرىز كۇندەرى – ناۋرىزناما ونكۇندىگى دەپ جاريالاندى. اتاپ ايتقاندا, 14 ناۋرىز امال مەرەكەسى تويلاندى. ال بۇگىن, 15 ناۋرىز – قايىرىمدىلىق كۇنى. ونى ەل بويىنشا قايىرىمدىلىققا, مەيىرىم مەن تاتۋ كورشىلىككە ارنايمىز. وسى ورايدا, قازاقستاننىڭ قاي ەلدەرگە كومەك قولىن سوزىپ, قيىن ساتتەردە قولداۋ كورسەتكەنىنە كوز جۇگىرتتىك.

قازاقستان حالىقارالىق قاۋىمداستىقتىڭ تولىققاندى مۇشەسى بولعاندىقتان, باسىنا قيىن ءىس تۇسكەن مەملەكەتتەرگە قولدان كەلگەن كومەگىن اياپ كورگەن ەمەس. وعان كەيىنگى جىلدىڭ ىشىندە عانا جان-جاققا جونەلتىلگەن گۋمانيتارلىق جۇكتەر دالەل. گۋمانيتارلىق كومەكتىڭ باسىم بولىگى ورتالىق ازياداعى ىرگەلەس ەلدەرگە كورسەتىلگەنىن ايتا كەتۋ كەرەك.

سىرتقى ىستەر مينيسترلىگىنىڭ جانىنداعى «قازاقستان حالىقارالىق دامۋ اگەنتتىگى» (KazAID) كوممەرتسيالىق ەمەس اكتسيونەرلىك قوعامى ۇسىنعان دەرەك بويىنشا, 2021 جىلى قازاقستان 13,9 ملن دوللاردىڭ گۋمانيتارلىق كومەگىن كورسەتكەن. كومەكتى قابىلداۋشى ەلدەر – قىرعىز رەسپۋبليكاسى, تاجىكستان جانە اۋعانستان.
ال 2022 جىلى 23,4 ملن دوللاردىڭ گۋمانيتارلىق كومەگىن پاكىستان يسلام رەسپۋبليكاسى, ۋكراينا, قىرعىز رەسپۋبليكاسى, تاجىكستان جانە اۋعانستان ەلدەرىنە جولداعان.
2023 جىلدىڭ قاڭتارىنان قىركۇيەك ايىنا دەيىن 62,7 ملن دوللاردىڭ گۋمانيتارلىق كومەگىن پاكىستان يسلام رەسپۋبليكاسى, تۇركيا رەسپۋبليكاسى, سيريا اراب رەسپۋبليكاسى, تاجىكستان جانە اۋعانستان ەلدەرىنە جونەلتكەن.

اتاپ ايتقاندا, 2023 جىلى 6 اقپان كۇنى تۇركيادا ەپيتسەنترى كاحرامانماراش پروۆينتسياسىنىڭ پازاردجيك اۋدانىندا 7 بالدان اساتىن ەكى رەت جەر سىلكىندى. ودان كەيىنگى جۇزدەگەن دۇمپۋلەر ەلدىڭ 11 پروۆينتسياسىندا جانە سيريا سەكىلدى كورشى مەملەكەتتەردە دە سەزىلدى. قازاقستان رەسپۋبليكاسى پرەزيدەنتى قاسىم-جومارت توقاەۆتىڭ تاپسىرماسى بويىنشا قازاقستان ۇكىمەتى جويقىن جەر سىلكىنىسىنەن زارداپ شەككەن سيريا حالقىنا گۋمانيتارلىق كومەك جاسادى. ۇكىمەت جويقىن جەر سىلكىنىسى سالدارىنان زارداپ شەككەن تۇركيا رەسپۋبليكاسىنا كومەك رەتىندە 1 ملن دوللار ءبولدى.