«حالىق مەنى بەكەر قارعاپ سىلەيدى». اتىشۋلى حاسان قاسىمباەۆ سوتقا ارىز ءتۇسىردى

فوتو: DALA INSIDE

قوعامدا كەڭىنەن تالقىلانىپ جاتقان شەرزات ءىسى تىڭ مالىمەتتەرمەن تولىعۋدا.

DALA INSIDE (https://t.me/dalainside)-قا ءمالىم بولعانداي, وسى ىستە ەسىم-سويى ءجيى ۇشىراسقان حاسان قاسىمباەۆ ءوزىنىڭ ار-نامىسى مەن ابىرويىن قورعاۋ ماقساتىندا مارقۇم بالانىڭ اكەسىنە جانە تاعى باسقا تۇلعالارعا قارسى ارىز دايىنداپ, تالعار اۋداندىق سوتىنا تاپسىرعان, – دەپ جازادى qandastar.kz

حاساننىڭ ايتۋىنشا, ونىڭ اتىنا تاعىلعان ايىپتار مەن قوعامداعى اڭگىمەلەر شىندىققا جاناسپايدى. ول قاراپايىم تۇرمىستىق توبەلەستى ۇيىمداسقان قىلمىستىق توپتاردىڭ اراسىنداعى قاقتىعىس رەتىندە كورسەتۋگە تىرىسىپ جاتىر دەگەن پىكىردە.

كاسىمباەۆتىڭ پىكىرىنشە, ونى اتىشۋلى قىلمىستىق توپپەن بايلانىستىرۋ نەگىزسىز. الگى ارىزدا ول ەشقاشان كىسى ولتىرۋگە قاتىستى جاستاردى كورمەگەنىن, بىلمەگەنىن جانە ولاردىڭ ارەكەتتەرىنە ەشقانداي قاتىسى جوق ەكەنىن مالىمدەگەن.

حاسان كەز-كەلگەن قوعامدىق الاڭدا, ءتىپتى باق ارقىلى ءوزىنىڭ كىناسىزدىگىن دالەلدەۋگە دايىن ەكەنىن باسا ايتقان. ونىڭ ويىنشا, بۇل وقيعا قاراپايىم تۇرمىستىق جانجال بولعان, بىراق ونى ادەيى بۇرمالاپ, ۇلكەن قىلمىستىق استار قوسىپ, ونىڭ اتىنا كىر كەلتىرمەكشى.

بۇعان دەيىن باق بەتتەرى مەن الەمجەلىدە مارقۇم شەرزات پەن ونىڭ وتباسىنا شابۋىل جاساعان ءبىر توپ بۇزاقىنىڭ «حۋتور» اتتى جەرگىلىكتى باندىمەن بايلانىسى بار دەگەن اقپار تاراعان ەدى. بىرنەشە دەرەككوز توپتىڭ توبە باسىندا حاسان ەسىمدى ازاماتتىڭ تۇرعانىن جازعان بولاتىن.

الماتى وبلىستىق پوليتسيا دەپارتامەنتى شەرزاتتىڭ ولىمىنە كۇدىكتى رەتىندە ۇستالعان جەتى ادامنىڭ ۇيىمداسقان قىلمىستىق ەش قاتىسى جوعىن جەتكىزگەن.

DALA INSIDE (https://t.me/dalainside)-قا بەلگىلى بولعانداي, قىلمىستىق توپ 2015-2016 جىلدارى بەلسەندى بولعان, ونىڭ جەتەكشىسى ەرجان قاسىمباەۆ ادام ولتىرگەنى ءۇشىن 15 جىلعا سوتتالعان, قازىر اباقتىدا وتىر.

قاسىمباەۆتار ءۇش اعايىندى. اقوردا ماڭىنداعى كۇبىر-سىبىرعا جاقىن جۇرەتىن ينسايدەرلەردىڭ ايتۋىنشا شەرزاتتىڭ وقيعاسىندا ەسىم-سويى ءجيى ۇشىراسقان اتىشۋلى حاسان قازىر الماتىدا تۇرادى, ونىڭ اعاسى اسىلان تالعار قالاسى اكىمىنىڭ اپپارات جەتەكشىسى.