حالىق ۇكىمەتتىڭ جاردەمىنە ۇيرەنىپ قالعان – ساراپشى

ۇلتتىق ستاتيستيكا بيۋروسىنىڭ دەرەكتەرىنە سايكەس, 2023 جىلدىڭ ءىى توقسانىندا تابىسى ەڭ تومەنگى كۇنكورىس دەڭگەيىنەن تومەن حالىقتىڭ ۇلەسى 5,1 پايىز بولعان. بۇل كەدەيشىلىك شەگىندە 1 ملن-نان استام وتانداسىمىز ءومىر ءسۇرىپ جاتىر دەگەن ءسوز. وتكەن جىلدىڭ قورىتىندىسى بويىنشا 500 مىڭنان استام قازاقستاندىق اتاۋلى الەۋمەتتىك كومەك العان.

ء«بىزدىڭ حالىق ۇكىمەتتىڭ جاردەمىنە ۇيرەنىپ قالعان. بۇل كەڭەس داۋىرىنەن باستالعان دۇنيە. ودان كەيىن بيلىكتەگىلەر ءاربىر سوزىندە «حالىق ءۇشىن» دەپ ايتا بەرەدى, سودان حالىق «بىزگە ۇكىمەت ءبارىن دايارلاپ بەرۋى كەرەك ەكەن» دەپ ويلايدى. 2019 جىلى نەسيە تولەۋ مەرزىمىن كەشىكتىرىپ جۇرگەن ازاماتتارعا 300 مىڭ تەڭگەدەن نەسيە بەردىك. بۇل دۇرىس بولمادى, وعان ەكونوميستەر مەن قارجىگەرلەر قارسى ەدى. ماسەلەن, بىرەۋى نەسيەسىن تولەپ جۇرەدى, تولەمەگەن ەكىنشى ادامنىڭ نەسيەسى كەشىرىلدى. تولەگەن ادامدا «ەندى نەسيەنى تولەمەسەم بولادى ەكەن» دەگەن وي پايدا بولدى. ەكىنشىدەن, 2021 جىلى زەينەتاقى قورىنان 3,5 ترلن تەڭگە كوبىرەك اقشاسى بارلارعا تۇرعىن ءۇي جاعدايىن جاقسارتۋعا, دەنساۋلىعىنا دەپ بەرىلدى. بۇل داۋلەتتى ازاماتتاردى قولداپ, قۋاتتايتىن ءبىر ماسىلدىق بولدى», — دەدى ەكونوميست ساپارباي جوباەۆ.

قازاقستاندا ەڭ تومەنگى جالاقى 85 مىڭ تەڭگەنى قۇرايدى. بيلىك بيىلعى 1 قاڭتاردان باستاپ ەڭ تومەنگى زەينەتاقى 57 853 تەڭگەگە, ەڭ تومەنگى كۇنكورىس دەڭگەيى 43 407 تەڭگەگە, ال بازالىق زەينەتاقى تولەمىنىڭ ەڭ تومەنگى مولشەرى 28 215 تەڭگەگە جەتكەنىن حابارلايدى