Halyq úkimettiń járdemine úırenip qalǵan – sarapshy

Ulttyq statıstıka bıýrosynyń derekterine sáıkes, 2023 jyldyń II toqsanynda tabysy eń tómengi kúnkóris deńgeıinen tómen halyqtyń úlesi 5,1 paıyz bolǵan. Bul kedeıshilik sheginde 1 mln-nan astam otandasymyz ómir súrip jatyr degen sóz. О́tken jyldyń qorytyndysy boıynsha 500 myńnan astam qazaqstandyq ataýly áleýmettik kómek alǵan.

«Bizdiń halyq úkimettiń járdemine úırenip qalǵan. Bul Keńes dáýirinen bastalǵan dúnıe. Odan keıin bıliktegiler árbir sózinde «halyq úshin» dep aıta beredi, sodan halyq «bizge úkimet bárin daıarlap berýi kerek eken» dep oılaıdy. 2019 jyly nesıe tóleý merzimin keshiktirip júrgen azamattarǵa 300 myń teńgeden nesıe berdik. Bul durys bolmady, oǵan ekonomıster men qarjygerler qarsy edi. Máselen, bireýi nesıesin tólep júredi, tólemegen ekinshi adamnyń nesıesi keshirildi. Tólegen adamda «endi nesıeni tólemesem bolady eken» degen oı paıda boldy. Ekinshiden, 2021 jyly zeınetaqy qorynan 3,5 trln teńge kóbirek aqshasy barlarǵa turǵyn úı jaǵdaıyn jaqsartýǵa, densaýlyǵyna dep berildi. Bul dáýletti azamattardy qoldap, qýattaıtyn bir masyldyq boldy», — dedi ekonomıst Saparbaı Jobaev.

Qazaqstanda eń tómengi jalaqy 85 myń teńgeni quraıdy. Bılik bıylǵy 1 qańtardan bastap eń tómengi zeınetaqy 57 853 teńgege, eń tómengi kúnkóris deńgeıi 43 407 teńgege, al bazalyq zeınetaqy tóleminiń eń tómengi mólsheri 28 215 teńgege jetkenin habarlaıdy