جاڭالىقتار
ءىىم: 5 قالادا Web-Cam ستۋديا ۇيىمداستىرعان توپقا قاتىستى تەرگەۋ اياقتالدى
فوتو: Polisia.kz
ءىىم تەرگەۋ دەپارتامەنتى ترانسۇلتتىق ۇقت قۇرۋ جانە وعان قاتىسۋ فاكتىسى بويىنشا كوپ ەپيزودتى قىلمىستىق ءىستى تەرگەۋدى اياقتادى, دەپ جازدى qandastar.kz
2023 جىلدىڭ تامىز ايىندا ءىىم ۇيىمداسقان قىلمىسقا قارسى كۇرەس جونىندەگى بولىنىستەرىمەن بەس ءىرى قالادا (استانا, الماتى, شىمكەنت, قاراعاندى, اقتوبە) قازاقستان مەن جاقىن شەتەلدەردىڭ ازاماتتارى ۇستالدى. ولار مودەلدىك اگەنتتىكتىڭ اتىن جامىلىپ, Web-Cam ارقىلى ينتيمدىك سيپاتتاعى ماتەريالداردى دايىنداۋمەن جانە تاراتۋمەن اينالىسقان.
قىلمىستىق بيزنەسكە 18 جاستان 25 جاسقا دەيىنگى قازاقستاندىق قىزدار تارتىلعان.
turkystan.kz حابارلاعانداي, قىلمىستىق توپتىڭ اقشا اينالىمى ءۇش ميلليارد تەڭگەدەن اسقاندىعى انىقتالدى.
قىلمىستىق ءىس بويىنشا 21 ادام كۇدىكتى دەپ تانىلعان. ولاردىڭ مۇلكى تاركىلەنىپ, 12 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالۋى مۇمكىن.
«وتكەن جىلدىڭ جەلتوقسان ايىندا وسىعان ۇقساس قىلمىستىق سىزبانىڭ جولى كەسىلدى. شىعىس قازاقستان وبلىسى پروكۋراتۋراسىنىڭ ۇيلەستىرۋىمەن اۋماقتىق ۇيىمداسقان قىلمىسقا قارسى كۇرەس ءبولىنىسىنىڭ جەدەل ۋاكىلدەرى ءبىر مەزگىلدە ەلىمىزدىڭ 11 وڭىرىندە اتالعان قىلمىسقا قاتىسى بار 50-دەن استام ادامدى قۇرىقتاپ, جەتكىزدى. سوتقا دەيىنگى تەرگەپ-تەكسەرۋ ۇقت قۇرۋ جانە وعان قاتىسۋ فاكتىسى بويىنشا جۇرگىزىلۋدە», – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى
