ءىىم ازاماتتاردى ساپارعا شىعۋدان باس تارتۋعا شاقىردى

فوتو: اشىق دەرەككوز

قر ىشكى ىستەر مينيسترلىگى جول قوزعالىسىنا قاتىسۋشىلارعا ماڭىزدى ەسكەرتۋ جاسادى, دەپ حابارلايدى qandastar.kz

– قۇرمەتتى ازاماتتار! جول قوزعالىسىنىڭ قاتىسۋشىلارى! اۋا رايىنىڭ ناشارلاۋىنا, بوران مەن قارعا, كوكتايعاق پەن كورىنۋدىڭ تومەندەۋىنە بايلانىستى قازىرگى ۋاقىتتا 15 وبلىستىڭ 43 جول ۋچاسكەسىندە اۆتوكولىكتەردىڭ قوزعالىسىنا شەكتەۋ ەنگىزىلدى. رەسپۋبليكالىق ماڭىزى بار التى مىڭنان استام شاقىرىم جولدا, ياعني كورسەتىلگەن ساناتتاعى جولداردىڭ 25%-ىندا شەكتەۋلەر ەنگىزىلگەن, – دەپ اتاپ ءوتتى ءىىم اكىمشىلىك پوليتسيا كوميتەتى باسقارما باستىعىنىڭ ورىنباسارى ايدىن ورازباەۆ.

سونداي-اق ءىىم ازاماتتاردى ساپارعا شىعۋدان باس تارتۋعا شاقىردى.

– وسى ورايدا ءبىز سىزدەردى ساپارعا شىعۋدان باس تارتۋعا شاقىرامىز. جولعا شىعىپ قويعان ازاماتتارعا جابىلعان جول ۋچاسكەلەرىنە جاقىن ورنالاسقان ەلدى مەكەندەردە توقتاپ, اۋا رايىنىڭ جاقسارۋىن كۇتۋدى ۇسىنامىز. تاۋەكەلگە بارۋدىڭ قاجەتى جوق! قوزعالىسقا شەكتەۋ ەنگىزىلگەن ناقتى جول ۋچاسكەلەرى تۋرالى «قازاۆتوجولدىڭ» رەسمي Telegram-ارناسىندا, راديو, تەلەديدار جانە باسقا دا بۇقارالىق اقپارات قۇرالدارىندا, سونداي-اق 1403 تەلەفون ءنومىرى ارقىلى بىلە الاسىزدار. جولدا ساق بولىڭىزدار! – دەدى ۆەدومستۆو وكىلى.