Jańalyqtar
IIM ýaqytsha ustaý ızolıatoryndaǵy vıdeoǵa pikir bildirdi
Vedomstvonyń málimetinshe, Almaty oblysy Eńbekshiqazaq aýdanyny ýaqytsha ustaý ızolıatoryndaǵy jaǵdaı boıynsha tekserý júrgizildi.
«Vıdeony ýaqytsha ustaý ızolıatorynyń burynǵy qyzmetkeri qyzmet múddelerine qaıshy áreket jasap, júrgizgeni anyqtaldy. Ol bul úshin jeke uıaly telefonyn paıdalanǵan. Qyzmettik tártipti óreskel buzǵany úshin ol arnaıy sheninen aıyrylyp, teris sebeptermen jumystan qýyldy», – delingen habarlamada.
Sonymen qatar atalǵan fakti boıynsha qylmystyq is qozǵalǵany belgili boldy.
Qyzmettik tártipti óreskel buzǵany jáne tıisinshe baqylaý júrgizbegeni úshin 16 basshy men qyzmetker laýazymnan bosatyldy. Onyń ishinde ýaqytsha ustaý ızolıatorynyń basshysy da qyzmetinen qýyldy.
«IIM mundaı buzýshylyqtarǵa múldem tózbeýshilik tanytyp, qatań tosqaýyl qoıady. Olar búkil quqyq qorǵaý júıesiniń bedeline nuqsan keltirip, azamattardyń qaýipsizdigin qamtamasyz etip, kúndelikti óz mindetterin adal oryndaıtyn qyzmetkerlerdiń atyna daq túsiredi».Ishki ister mınıstrliginiń baspasóz qyzmeti
Mınıstrliktiń málimetinshe, bolǵan jaǵdaıǵa baılanysty ýaqytsha ustaý ızolıatorynda baqylaý kúsheıtildi: qosymsha beınemonıtorıng sharalary engizilip, uqsas mekemelerde jospardan tys tekserýler bastaldy.
Eske salaıyq, buǵan deıin áleýmettik jelide Sherzat Polatty óltirdi degen kúdiktilerdiń biriniń ýaqytsha ustaý ızolıatoryndaǵy vıdeosy taraǵan edi.
Onda olar týǵan kún toılap, «Alısa» arqyly Qaırat Nurtastyń «Týǵan kún» ánine «tapsyrys» berip, tipti torttaǵy shamdy da úrleıdi.
Jeli qoldanýshylary aýyr qylmys jasady dep aıyptalǵandardyń ýaqytsha ustaý ızolıatorynda bulaı ómir súrip jatqanyna narazy boldy.
Almaty oblysynyń polıııasy Zakon.kz tilshisine qyzmettik tekseris bastalǵanyn habarlady.
«Ýaqytsha ustaý ızolıatorynda ustalǵandardyń biriniń týǵan kúnin toılap jatqany túsirilgen vıdeoǵa qatysty jan-jaqty tergeý júrip jatyr. Barlyq kináliler, onyń ishinde basshylyq qatań jaýapkershilikke tartylady. Tergeý barysy erekshe baqylaýda», – dep habarlady vedomstvo sol kezde.
