جاڭالىقتار
ءىىم WhatsApp جەلىسىندەگى جالعان حابارلامالارعا قاتىستى مالىمدەمە جاسادى
فوتو:Shutterstock
WhatsApp مەسسەندجەرىنىڭ پايدالانۋشىلارىنا «ەرتەڭنەن» باستاپ فوتوسۋرەتتەر مەن ۆيدەولاردى جىبەرۋ قاۋىپتى بولادى دەگەن حابارلامالار تاعى دا كەلىپ جاتىر. حاتتا فايلداردىڭ بارلىعىندا ۆيرۋستار بولاتىنى, اقپارات ءىىم-ءنىڭ ەسەپتەرىندە دە راستالعانى ايتىلعان. سونداي-اق حابارلامادا دايش تەرروريستىك ۇيىمى مۇشەلەرىنىڭ قوڭىراۋلارى تۋرالى دا ءسوز ەتىلگەن. Stopfake سايتى بۇل ەكى اقپاراتتى جوققا شىعاردى, دەپ حابارلايدى qandastar.kz
اقپاراتتىڭ شىنايىلىعىن تەكسەرەتىن سايتتىڭ مالىمەتىنشە, العاش رەت مەسسەندجەرلەردە فوتوسۋرەتتەر مەن ۆيدەولار ارقىلى تارالاتىن ۆيرۋستار تۋرالى جالعان اقپارات 2022 جىلدىڭ قىركۇيەگىندە شىققان. ول قازىر تاراپ جاتقان اقپاراتقا ۇقسايدى. قازاقستان رەسپۋبليكاسىنىڭ ىشكى ىستەر مينيسترلىگى بۇل قاۋەسەتتەردى جوققا شىعاردى.
ء«ىىم-ءنىڭ كومپيۋتەرلەر مەن تەلەفونداردى ىستەن شىعاراتىن اشىق حاتتار مەن ۆيدەولار ارقىلى ۆيرۋستاردى تاراتاتىن حاكەرلەردىڭ ارەكەتتەرى تۋرالى ايتىلعان اقپارات شىندىققا سايكەس كەلمەيدى جانە فەيك بولىپ تابىلادى», – دەپ حابارلادى ۆەدومستۆونىڭ ءباسپاسوز قىزمەتى.
حابارلامانىڭ ەكىنشى بولىگىندە بەلگىسىز بىرەۋلەردەن كەلىپ تۇسەتىن قوڭىراۋلار تۋرالى ەسكەرتىلەدى. ولار دايش تەرروريستىك ۇيىمىمەن بايلانىستى ەكەن. وسى فەيككە سايكەس, ەگەر سول نومىرگە قايتا حابارلاساتىن بولساڭىز, الاياقتار ءسىزدىڭ بايلانىس ءنومىرىڭىزدى جانە بانكتىك كارتا دەرەكتەرىن كوشىرىپ الادى.
بۇل ميف ينتەرنەت كەڭىستىگىندە ەكى جىلدان استام ۋاقىت بويى تارالىپ كەلەدى, العاش رەت 2022 جىلدىڭ قاڭتارىندا شىققان. سونىمەن قاتار بەيتانىس نومىرلەردەن كەلىپ تۇسكەن قوڭىراۋلار قاۋىپتى بولۋى مۇمكىن ەكەنىن ەستەن شىعارماعان ءجون.
«Factcheck.tj پورتالى ۆانگيري دەپ اتالاتىن الاياقتىق سحەمانى ەگجەي-تەگجەيلى سيپاتتادى. بۇل جاعدايدا تەلەفونعا حالىقارالىق نومىردەن قابىلدانباعان قوڭىراۋ تۇسەدى. ەگەر ادام قايتا قوڭىراۋ شالسا, ول حالىقارالىق بولىپ سانالادى. وسىلايشا, الاياقتار شەتەلگە قوڭىراۋ شالۋ ءتاريفىنىڭ جوعارى بوۋلىنان اقشا تابا الادى», – دەلىنگەن ماتەريالدا.
ماماندار مەسسەندجەرلەر مەن الەۋمەتتىك جەلىلەر ارقىلى تارالاتىن بارلىق اقپاراتقا سەنۋگە بولمايتىنىن, حابارلاماعا كۇمان كەلتىرسەڭىز, ونى رەسمي اقپارات كوزدەرى ارقىلى تەكسەرگەن ءجون ەكەنىن ەسكەرتتى.
