Jańalyqtar
IIM WhatsApp jelisindegi jalǵan habarlamalarǵa qatysty málimdeme jasady
Foto:Shutterstock
WhatsApp messendjeriniń paıdalanýshylaryna «erteńnen» bastap fotosýretter men vıdeolardy jiberý qaýipti bolady degen habarlamalar taǵy da kelip jatyr. Hatta faıldardyń barlyǵynda vırýstar bolatyny, aqparat IIM-niń esepterinde de rastalǵany aıtylǵan. Sondaı-aq habarlamada DAISh terrorıstik uıymy músheleriniń qońyraýlary týraly da sóz etilgen. Stopfake saıty bul eki aqparatty joqqa shyǵardy, dep habarlaıdy qandastar.kz
Aqparattyń shynaıylyǵyn tekseretin saıttyń málimetinshe, alǵash ret messendjerlerde fotosýretter men vıdeolar arqyly taralatyn vırýstar týraly jalǵan aqparat 2022 jyldyń qyrkúıeginde shyqqan. Ol qazir tarap jatqan aqparatqa uqsaıdy. Qazaqstan Respýblıkasynyń Ishki ister mınıstrligi bul qaýesetterdi joqqa shyǵardy.
«IIM-niń kompıýterler men telefondardy isten shyǵaratyn ashyq hattar men vıdeolar arqyly vırýstardy taratatyn hakerlerdiń áreketteri týraly aıtylǵan aqparat shyndyqqa sáıkes kelmeıdi jáne feık bolyp tabylady», – dep habarlady vedomstvonyń baspasóz qyzmeti.
Habarlamanyń ekinshi bóliginde belgisiz bireýlerden kelip túsetin qońyraýlar týraly eskertiledi. Olar DAISh terrorıstik uıymymen baılanysty eken. Osy feıkke sáıkes, eger sol nómirge qaıta habarlasatyn bolsańyz, alaıaqtar sizdiń baılanys nómirińizdi jáne banktik karta derekterin kóshirip alady.
Bul mıf ınternet keńistiginde eki jyldan astam ýaqyt boıy taralyp keledi, alǵash ret 2022 jyldyń qańtarynda shyqqan. Sonymen qatar beıtanys nómirlerden kelip túsken qońyraýlar qaýipti bolýy múmkin ekenin esten shyǵarmaǵan jón.
«Factcheck.tj portaly vangırı dep atalatyn alaıaqtyq shemany egjeı-tegjeıli sıpattady. Bul jaǵdaıda telefonǵa halyqaralyq nómirden qabyldanbaǵan qońyraý túsedi. Eger adam qaıta qońyraý shalsa, ol halyqaralyq bolyp sanalady. Osylaısha, alaıaqtar shetelge qońyraý shalý tarıfiniń joǵary boýlynan aqsha taba alady», – delingen materıalda.
Mamandar messendjerler men áleýmettik jeliler arqyly taralatyn barlyq aqparatqa senýge bolmaıtynyn, habarlamaǵa kúmán keltirseńiz, ony resmı aqparat kózderi arqyly teksergen jón ekenin eskertti.
